“Yeni Bakı”nın su probleminə "Azərsu"dan - Rəsmi cavab

"Yeni Bakı" yaşayış kompleksinin sakinləri “Azərsu”yun rəsmi abonenti kimi tanınmır.

Bu barədə Teleqraf.com-a yaşayış kompleksinin sakinləri məlumat verib.

Bildirilir ki, şəhərcikdə 650 ailə yaşayır. Bu da orta hesabla 3000-dən çox sakin deməkdir. Sakinlərin şikayəti “Yeni Bakı” yaşayış kompleksində içməli su sisteminin düzgün qurulmamasından, su sayğaclarının “Azərsu”ya təhvil verilməməsindən, su rezervuarlarının təmiz saxlanmamasından, kompleksin qanunsuz komendantlığının sakinləri tez-tez su ilə “sınağa” çəkməsindən, suyun tez-tez kəsilməsindən, eləcə də “Azərsu”nun “İDF” MMC-ni, “İDF” MMC-nin də “Azərsu”nu qarşılıqlı ittiham etməsindəndir.

Şikayətçilər deyir ki, "Yeni Bakı" yaşayış kompleksini inşa etmiş "İlin Dörd Fəsli" (İDF) MMC-nin (şirkətin rəhbəri Elnur Hüseynovdur) kompleksdə çəkdiyi içməli su xətləri, bu xətləri hərəkətə gətirən nasoslar və çirkab sular axıdılan borular bərbad vəziyyətdədir: “Ona görə də bu xətlər tez-tez sıradan çıxır və biz sakinlər içməli su problemi ilə üzləşirik. Bu problemin digər tərəfi isə içməli suyun və çirkab suların yığıldığı yeraltı rezervuarlardır. Kompleksdə içməli suyun depolandığı yeraltı rezervuarlarda indiyə qədər heç bir anti-sanitariya işləri aparılmayıb və mənzillərə verilən içməli sular heç də içməli vəziyyətdə deyil.

Digər problem isə çirkab suların axıdıldığı yeraltı rezervuarlardır ki, bunlarda da germetizasiya işləri qaydalara uyğun aparılmadığından və vaxtaşırı təmizlənmədiyindən kompleksi ara-sıra pis qoxu bürüyür və bu üfunət sakinləri ciddi narahat edir.

Həmçinin qeyd etdiyimiz xətlər qaydalara uyğun olmayaraq binalarda mənzillərin daxilindən çəkildiyinə görə, hər hansı problem yarandıqda məcburən sakinin mənzilində təmir işləri aparılır ki, bu da sakinləri əlavə xərcə salır”.

Sakinlər heç bir yaşayış kompleksində görünməyən bir problemlə də qarşılaşıblar. Onların sözlərinə görə, su sayğacları "Azərsu" ASC tərəfindən hələ də qeydiyyata alınmayıb: “Bunun səbəbini "Azərsu"dan soruşduqda bizə bildirilir ki, kompleksdə su sistemi standartlara uyğun qurulmadığından “İDF” MMC ilə təhvil-təslim aparılmır və nəticədə sayğaclar da rəsmiləşdirilmir.

Başqa bir problemimiz də ondan ibarətdir ki, “İDF” MMC kompleksdə sakinlərdən qanunsuz ödənişlər tələb etmək üçün sudan təzyiq vasitəsi kimi istifadə edir. Qeyd edək ki, əvvəllər “İDF” MMC təzyiq məqsədilə elektrik enerjisindən istifadə edirdi. Ancaq elektrik sayğacları "Azərişıq" ASC-nin balansına keçdikdən və hər bir sakin fərdi abonent kimi tanındıqdan sonra bu məsələ qismən səngidi və “İDF” MMC məkrli oyununu bu dəfə su üzərindən həyata keçirməyə başladı. Artıq suyun fasilələrlə və ya aşağı təzyiqlə verilməsi şəhərcikdə adi hal alıb. Şəhərciyə qanunsuz şəkildə təyin olunan komendantlıqdan bunun səbəbini soruşduqda isə bizə gah su nasoslarının sıradan çıxdığı, gah kompleksə gələn içməli su xətlərinin diametrinin kiçik olması, gah da günahkarın "Azərsu" ASC olduğu bildirilir. Məhz "Azərsu"nun şəhərciyi su ilə tam təmin edə bilmədiyi vurğulanır. Belə vəziyyətdə 10 min nəfərdən çox sakini olan şəhərcik "Azərsu" ASC ilə üz-üzə qoyulur.

Halbuki “İDF” MMC-nin "Yeni Bakı" şəhərciyi üzrə "Azərsu" ASC-yə 4 fevral 2021-ci il tarixinə borcu 40 min 360 AZN təşkil edir. Maraqlıdır ki, suya görə bu qədər borcu olan şirkət "Azərsu"ya ayda cəmi 1200-1300 manat ödəniş edir. 3200-dən çox mənzilin yerləşdiyi və 13 hektar ərazisi (böyük yaşıllıq sahəsi) olan şəhərcikdə bu qədər az suyun sərf edilməsi, əlbəttə ki, mümkün deyil. Burada sudan sayğacdankənar istifadəyə dair əsaslı şübhələr yaranır. Mənzildaxili sayğaclar rəsmi qeydiyyatdan keçmədiyi üçün bu vəziyyət “İDF” MMC-yə müəyyən maliyyə maxinasiyaları üçün şərait yaradır.

Bir məsələ də var ki, 2021-ci ilin fevral ayının 1-dən etibarən Tarif Şurasının qərarına əsasən, hər kubmetr sudan istifadəyə (və çirkab suların atılması) görə, "Azərsu"ya 1 AZN ödənməlidir. Bu isə “İDF” MMC-yə növbəti maxinasiyalar üçün əlavə imkanlar verir. İstisna deyil ki, yeni mərhələdə “İDF” MMC sakinlərə daha çox təzyiq göstərəcək”.

Sakinlər 650-dən çox imza ilə müraciətin əslini dövlət başçısına, surətlərini isə Baş Nazir Əli Əsədov və “Azərsu” ASC-nin rəhbəri Qorxmaz Hüseynova göndərib.

"Azərsu" ASC-nin mətbuat xidmətinin rəhbəri Anar Cəbrayıllı Teleqraf.com-a deyib ki, yaxınlarda şəhərciyin sakinləri ilə MTK-nın rəhbərliyi “Azərsu”da faydalı görüş keçiriblər: “Onlar qurumun sədr müavini ilə görüşüblər, kodlaşma məsələsi müzakirə olunub. Hazırda sözügedən məsələ istiqamətində iş aparılır. Orada müəyyən nüanslar var, həllini tapan kimi hər bir mənzil kodlaşdırılacaq”.

Qurum rəsmisi onu da qeyd edib ki, hər bir mənzilə sayğacı MTK-lar özləri quraşdırır: ““Azərsu”yun verdiyi texniki şərtlərə su, kanalizasiya xəttinin çəkilişi, eləcə də anbar və ya nasos stansiyasının tikintisi daxildir. Bu texniki şərt daxilində MTK sağaclama prosesini özünü aparır. Ümumiyyətlə, yeni tikilən binaların heç birinə “Azərsu” sayğac qoymur”.