Cahangir Hacıyev ifadə verəcək - MƏHKƏMƏ

Bu gün Bakı Ağır Cinayətlər Məhkəməsində Azərbaycan Beynəlxalq Bankının idarə heyətinin keçmiş sədri Cahangir Hacıyev və daha 7 nəfərin cinayət işi üzrə məhkəmə prosesi davam edib.

Teleqraf.com xəbər verir ki, hakim Əfqan Hacıyevin sədrliyi ilə keçirilən prosesdə Cahangir Hacıyevin vəkilləri - Fəxrəddin Mehdiyev və Aqil Layicov vəsatətlə çıxış ediblər.

Vəkillər məhkəmə tərkibinə etiraz ediblər. Fəxrəddin Mehdiyev deyib ki, buna səbəb məhkəmə heyətinin indiyədək 6 vəsatətdən heç birini təmin etməməsidir.

Dövlət ittihamçısı Fərid Nağıyev vəsatətin əsasız olduğunu və təmin edilməıməsini istəyib. Məhkəmə vəsatəti baxılmamış saxlayıb.

Daha sonra dövlət ittihamçısı ittiham aktını elan edib. Cahangir Hacıyev və digər təqsirləndirilən şəxslər özlərini təqsirli bilməyiblər.

Proses günün ikinci yarısında davam edəcək.

İttihama görə, Azərbaycan Beynəlxalq Bankının idarə heyətinin keçmiş sədri Cahangir Hacıyev, Mərkəzi filialın direktorları işləmiş Yusif Ələkbərov və Anar Sultanov, Mərkəzi filialın müdiri işləmiş İlqar Abdullayev, bankın inzibati binalarının mühafizəsini həyata keçirən “İnter Security” MMC-nin baş direktoru İbrahim Hüseynov, bankın Nəqliyyat filialının direktoru işləmiş Kənan Orucov, bankın Nərimanov filialının direktoru işləmiş, hazırda “AFB Bank” ASC-nin Müşahidə Şurasının sədri olan Məmməd Cahangirov və Bakı Fındıq Zavodunun direktoru işləmiş Azad Cavadov Cinayət Məcəlləsinin 179.3.1, 179.3.2 (mütəşəkkil dəstə tərəfindən külli miqdarda mənimsəmə), 308.2 (vəzifə səlahiyyətlərindən sui-istifadə ağır nəticələrə səbəb olduqda), 309.2 (vəzifə səlahiyyətlərini aşma ağır nəticələrə səbəb olduqda), 313-cü (vəzifə saxtakarlığı), 228.1 və 228.4-cü (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə ittiham edilirlər.

Hacı Zeynalov