Oğurluq avtomobil hissə-hissə bölündü - Əməliyyat

Bakı şəhər sakini İsmayıl İmamverdiyev Daxili İşlər Nazirlirlinin “102 Xidməti Zəng Mərkəzi”nə zəng edərək paytaxtın Nizami rayonu ərazisindən “VAZ-2107” markalı avtomobilinin qaçırılması barədə məlumat verib.

Teleqraf.com xəbər verir ki, 23-cü polis bölməsi qaçırılan avtomobilin Siyəzən rayonunda tapılması barədə məlumat əldə edib.

Siyəzən rayon polis şöbəsinin əməkdaşları ilə birlikdə keçirilən tədbirlərlə şübhəli şəxslər müəyyən edilərək saxlanılıblar.

Araşdırmalarla rayon sakinləri Teymur Əliyev və əvvəllər məhkum olunmuş Rövşən Həmidovun oğurladıqları, həmin avtomobili birincinin evinin həyətində ayrı-ayrı hissələrə böldükləri, bəzi hissələrini isə satdıqları müəyyən edilib.

Polis əməkdaşları tərəfindən qeyd edilən avtomobilin dam hissəsi Teymur Əliyevin həyətində aşkar edilərək, digər hissələr isə doğranmış vəziyyətdə rayon ərazisindəki gölün ətrafında tapılaraq maddi sübut kimi götürülüb.

Faktla əlaqədar cinayət işi başlanıb.