Ölkə boyu bir günün oğurluq əməliyyatları – DİN-dən açıqlama

Ötən gün polis orqanları tərəfindən həyata keçirilən əməliyyat tədbirləri nəticəsində oğurluqlar törədən bir sıra şəxslər müəyyən edilib.

Teleqraf.com xəbər verir ki, Daxili İşlər Nazirliyinin Kriminalistik Tədqiqatlar İdarəsi və Sumqayıt şəhər Polis İdarəsi 2-ci polis bölməsi əməkdaşlarının əməliyyat-axtarış tədbirləri nəticəsində ötən il noyabr ayından cari il yanvarın 19-dək olan müddətdə 8 evdən, 1 sexdən inşaat materialları, təmir-tikinti alətləri, elektrik naqili və məişət əşyaları oğurlamaqda şübhəli bilinən şəhər sakini, əvvəllər məhkum olunmuş Rasim Əliyev saxlanılıb.

Bundan başqa, ötən ilin noyabr ayından cari il yanvarın 24-dək olan müddətdə Sumqayıt şəhəri, 10-cu mikrorayondakı evlərin birinin liftinin əyləc dolağını, 1 mağazadan və 1 evdən inşaat materialları və məişət əşyaları oğurlamaqda şübhəli bilinən şəhər sakini, əvvəllər məhkum olunmuş Murad Xanbalayev saxlanılıb.

Oğurluq törədən şəxsin həbs edilməsi ilə bağlı daha bir əməliyyatı Kəpəz (Gəncə) rayon Polis İdarəsi əməkdaşları keçirib.

Ötən ilin noyabr ayından cari il yanvarın 11-dək olan müddətdə 3 avtomobildən və 4 evdən pul, məişət əşyaları, akkumulyator və maqnitofon oğurlamaqda şübhəli bilinən Gəncə şəhər sakini Münasib Əhmədov tutulub.

Beyləqan rayonunda da oğurluq cinayətlərinin üstü açılıb. Polis əməkdaşları tərəfindən ötən ilin aprelində və cari il yanvarın 21-də rayon ərazisindəki 2 evdən pul, mobil telefon və qızıl əşyalar oğurlamaqda şübhəli bilinən Örənqala qəsəbə sakinləri Yaşar Hacıyev və Nizami Nağıyev saxlanılıblar.

Bütün faktlarla bağlı cinayət işləri başlanıb.