Övladının 60 yaşlı müəlliməsilə intim əlaqədə oldu, "daha istəmirəm" dedikdə... – Şok

Bakının Qaradağ rayonunda 1985-ci il təvəllüdlü İsmayıl intim münasibətdə olduğu 1961-ci il təvəllüdlü Aytəni (adlar şərti verilib – red.) qətlə yetirib.

Teleqraf.com-un əldə etdiyi məlumata görə, İsmayıl uzun müddət sevgi və intim münasibətdə olduğu Aytənlə daimi görüşdükləri evdə yenidən görüşmək barədə razılaşıblar.

İsmayıl 25 may 2022-ci ildə saat 21 radələrində yeznəsi Səmədə konkret kimin evinə getməsini deməyib, onu avtomobillə Aytənin evinə aparmasını xahiş edib. Daha sonra binanın qarşısında Səməddən onu gözləməsini istəyib və Aytənin yaşadığı evə qalxıb.

Evdə Aytən ondan münasibətlərinə son qoymasını xahiş edib. İsmayıl isə əsassız yerə mübahisə yaradıb, evin mətbəx otağına keçərək götürdüyü bıçağı şalvarının cibində gizlədib, yenidən qonaq otağına gəlib.

Söhbət əsnasında heç bir səbəb olmadan mübahisəni davam etdirib, masanın üzərində olan şüşə dərman qabını götürərək Aytənə tərəf atıb. Aytən onun üstünə gəldikdə isə cibindən bıçağı çıxararaq, ona zərbələr vurub. Çoxsaylı zərbələr nəticəsində qadın ölüb.

Aytənin öldüyünə əmin olan İsmayıl onun üzərində və evində olan ümumilikdə 8100 manat dəyərində 3 qızıl boyunbağını, 2 cüt qızıl sırğanı, bir yaşıl qaşlı qızıl bilərziyi, iki qızıl üzüyü, bir üzük, bir bilərzik, bir cüt sırğa və boyunbağını, bir sepi klonu ilə birlikdə götürüb.

Cinayətin izlərini gizlətmək üçün otaqda olan geyim paltarlarını yataq otağında taxta döşəmə üzərində yığaraq yandırıb. Sonra evdən qaçaraq gedib.

İsmayıl törətdiyi yanğınla Aytənin mülkiyyətində olan evə ümumilikdə 19.060.00 manat dəyərində, eyni əməllə həmin ünvanın döşəmə qatının tamamilə yanması ilə digər evə keçmiş yanğın nəticəsində, həmin evin sahibinə isə 8.880.00 manat dəyərində ziyan vurub.

İstintaq orqanı tərəfindən İsmayılın barəsində Cinayət Məcəlləsinin 120.2.2 (xuliqanlıq niyyəti ilə adam öldürmə), 177.2.4 (xeyli miqdarda ziyan vurmaqla oğurluq törətmək) və 186.2.2-ci (əmlakı qəsdən məhv etmə və ya zədələmə - yandırmaqla, partlatmaqla və ya başqa ümumi təhlükəli üsulla törədildikdə və ya ağır nəticələrə səbəb olduqda) maddələri ilə ittiham elan edilib.

“Məqsədim həyat yoldaşımın müalicə etdirmək olub”

Cinayət işi üzrə təqsirləndirilən şəxs qismində ifadə verən İsmayıl ona elan olunmuş ittiham üzrə özünü təqsirli bilib. O bildirib ki, 8 sentyabr 2009-cu ildə Turanə ilə ailə həyatı qurub və onların birgə nikahından iki uşağı olub: “Əvvəllər ailəmlə birlikdə Lökbatan qəsəbəsində “SOCAR”ın binaları adlanan yaşayış massivində kirayədə yaşamışam.

2022-ci ilin yanvar ayında isə evdən çıxmışam və arvadımın xəstəliyi ilə əlaqədar Rusiyaya getmişəm. Məqsədim həyat yoldaşımı müalicə etdirmək idi.

Həmin il mayın 25-də Azərbaycana qayıtdım. Mərhum Aytəni təxminən 5 il əvvəldən tanıyırdım. Həmin vaxt Lökbatan qəsəbəsində yerləşən “Şəmkir” adlanan marketdə işləmişəm. Aytən müəllimə də tez-tez həmin mağazaya gələrək oradan alış-veriş edirdi”.

“İntim münasibətdə olmağa başladıq”

İsmayılın sözlərinə görə, övladı Aytən müəllimənin sinfinə, birinci sinfə daxil olub: “Bundan sonra Aytən müəllimə ilə yaxın münasibətim yarandı. Yaşadığı evdə onunla intim münasibətdə olmağa başladıq. Bundan başqa ailəvi münasibətimiz də yaxşı idi. Lakin ailəmin Aytənlə intim münasibətimizdən xəbəri olmayıb.

Sonradan ailə üzvlərim bundan xəbər tutsa da, mən Aytənlə münasibəti soyutduqdan sonra onlar da sakitləşdilər”.

İsmayılın ifadəsinə görə, Rusiyada olduğu müddətdə Aytənlə “Whatsapp” sosial proqramı vasitəsilə əlaqə saxlayıb:

“25 may 2022-ci ildə, səhər saat 4 radələrində Bakı şəhərinə qayıtdım. Bacımın həyat yoldaşı Səməd öz avtomobili ilə Heydər Əliyev adına Beynəlxalq hava limanına gələrək məni və mənimlə birlikdə gələn ailəmi qarşıladı. Biz Səmədin yaşadığı Lökbatan qəsəbəsindəki evinə getdik. Axşam radələrində ailə üzvlərimizlə birlikdə Səmədin evində yemək yedik.

Rusiyada olduğum zamanda da Aytənlə votsap vasitəsilə əlaqə saxlayırdım. Həmin vaxt Bakıya gələndə onunla görüşəcəyim barədə razılığa gəlmişdik. Aytən mənə 18 may 2022-ci ildə əri Salmanla birlikdə Türkiyənin Antalya şəhərinə qızları Nəsibənin toyuna getdiyini bildirdi. Aytən əri Salmandan ayrılmışdı və onlar ayrı-ayrı evlərdə yaşayırdıar”.

Təqsirləndirilən şəxs qeyd edib ki, Bakıya gəldikdən sonra Rusiyaya məxsus telefon nömrəsi işlədib: “Mayın 25-də Aytənlə votsapda əlaqə saxladım. Təxminən saat 17 radələrində Bakıya gəldiyi barədə mənə məlumat verdi. Təxminən saat 20 radələrində evə gəlməyimi istədi. Ona havanın hələ qaralmadığını desəm də, bildirdi ki, bacısı Səbinəgil də onlara gələcək, o vaxtacan mən gəlib-gedim. Aytənlə razılaşdım, 15 dəqiqə ərzində gələcəyimi dedim”.

“Fikirləşdim ki, başqası ilə evdə olduğuna görə qapını açmır”

İsmayılın sözlərinə görə, daha sonra Səmədin idarə etdiyi avtomobillə Lökbatan qəsəbəsində Aytənin yaşadığı 5 mərtəbəli binanın həyətinə gəlib:

“Səmədə kimin yanına və hansı məqsədlə getməyim barədə heç bir məlumat vermədim. Məqsədim Aytəınlə yaşadığı evdə 5-10 dəqiqə görüşüb çıxmaq idi. Maşınından düşərkən Səmədə 20 dəqiqəyə gələcəyimi dedim. Daha sonra Aytənin yaşadığı evə getdim.

Aytənin evinə getdiyim zaman həmişə qapını sakit döydükdə qapını açırdı. Bu dəfə təxminən 10-12 dəqiqə qapını döydüm, amma açan olmadı. Daha sonra bir oğlanın bloka daxil olduğunu hiss etdim. O, pilləkənlə yuxarı qalxdı. Oğlan 3-cü mərtəbəyə yaxınlaşdıqda görüntü yaratmaq üçün aşağı düşərək həmin oğlanın yanından keçdim. Lakin onun üzünə baxmadım. Fikirləşdim ki, yəqin Aytən başqa birisi ilə evdə olduğuna görə qapını açmadı. Qısqanclqıdan əsəbləşdim.

Ona görə də bir neçə dəfə qapını əlimlə möhkəm döyərək onu çağırdım. Yalnız bundan sonra Aytən qapını açdı və mənimlə görüşməyib qonağ otağına tərəf getdi. Onun arxasınca dəhlizə daxil oldum, daha sonra qonaq otağına tərəf getdim”.

“Mənimlə niyə görüşməməsini soruşdum”

İsmayıl qeyd edib ki, Aytən divara bitişik kreslonun üstündə oturub: “O mənə də keçib oturmağı deyərək yer göstərdi. Kresloya əyləşə-əyləşə ondan qapını gec açmasının səbəbini soruşdum. Cavabını gözləməyib “tualetdəydin?” deyərək təkrar soruşdum. Aytən isə “yox, nə tualetdə, paltarları yığıram, ütülüyəcəm indi” deyə cavab verdi. Qonaq otağı ilə yataq otağının arasında üst-üstə tökülmüş vəziyyətdə çoxlu paltar, dəsmal vardı.

Aytəndən mənimlə görüşməməsinin səbəbini soruşdum. Bildirdi ki, bir dayan, sözüm var sənə, bu günə kimi nə olubsa-olub, səninki səndə, mənimki məndə. Bu sözə təəccübləndim. Ondan “nə səbəbə bu sözləri deyirsən” soruşdum. Cavabı gözləmədən ayağa durdum, mətbəxə tərəf getdim.

Evdəki otaqlara göz gəzdirdim ki, görüm kimsə var, yoxsa yox. Çünki Aytəni birinci dəfə belə aqressiv gördüm. Mətbəxdə su içib oradakı bıçağı götürərək cibimə qoydum və Aytənin yanına qayıtdım.

Bıçağı götürməyimə səbəb o idi ki, birdən evdə başqa kimsə olar, ona görə hər ehtimala qarşı götürdüm. Kimisə öldürəcəyim heç yuxuma belə gəlməyib”.

“Səni sevmirəm, həyatımda başqası var”

Təqsirləndirilən şəxsin sözlərinə görə, Aytənin yanına gəlib, oturandan sonra ona “de görüm kimdir bu adam ki, məni ona dəyişirsən” sualını verib: “Aytən bir daha "bu günə qədər olan münasibət kifayətdir, artıq səni sevmirəm, həyatımda başqası var” söylədi. Mən də bu sözə əsəbiləşdim. Nə üçün belə etdiyini soruşanda evdən getməyimi tələb etdi. Məni ağır söyüşlərlə təhqir etməyə başladı.

Daha sonra “nə istəyirsən, o, səndən yaxşıdır, səndən yaxşı intim əlaqədə olur, çıx rədd ol” dedi. Bu sözlərdən bərk əsəbləşdiyim üçün özümü saxlaya bilmədim. Jurnal stolunun üzərindəki 100 qramlıq dərman şüşəsini götürərək sifətinə tərəf atdım. Aytən üzünü yana çevirdiyi üçün qab çənə nahiyəsinə dəydi, bir qədər aralıda olan qapıya toxunub sındı”.

“Çox böyük səhvlərə yol vermişəm”

İsmayıl bildirib ki, Aytən onun ünvanına nalayiq söyüşlər işlədib: “Dedi ki, mənimlə səndən yaxşı intim əlaqədə olan var, nə istəyirsən məndən, çıx rədd ol. Bu sözləri deyib əl-qol ata-ata üstümə gəldi. Cibimə qoyduğum bıçağı çıxardım və üstən aşağı onu vurmaq istədim.

Amma sol qolunu yuxarı qaldırıb qabağa verdiyi üçün bıçaq, səhv etmirəmsə, qoluna dəydi. Bıçağın Aytənin başqa harasına dəyməsini xatırlamıram.

Aytəngilə gələndə onun mənə qarşı bu hərəkətləri edəcəyini, yəni məni qapının ağzında gözlədəcəyini, sonra isə üzümə başqası ilə yaşadığını və həmin şəxsin məndən yaxşı cinsi əlaqədə olmasını deməsini heç gözləmirdim. Bizim aramızda heç vaxt belə bir münasibət, hərəkət olmayıb.

Ona görə Aytənin hərəkətlərindən və danışığından özümü itirdiyim üçün nə etdiyimi bilməmişəm. İndi başa düşürəm ki, çox böyük səhvlərə yol vermişəm. Aytənin “səni tutduracağam, səndən şikayət edəcəyəm, gör, başına nə oyun açacam” sözlərinə, eyni zamanda təhqiramiz ifadələrinə görə onu bıçaqla vurmuşam”.

“İdman fəndi ilə boğdum”

İsmayıl bildirib ki, daha sonra əli ilə Aytənin çiynindən itələyib: “O, yataq otağının qapısına dəyərək geriyə, ağzı üstə yerə yıxıldı. Səsinin çıxmadığını görəndə bərk qorxdum. Artıq hər şeyin gec olduğunu, yəni onun şikayət edəcəyini fikirləşdim, onu öldürmək qərarına gəldim. Əvvəllər “dzü do” idman növü ilə məşğul olduğuma görə boğucu fənd işlədib onu boğaraq öldürdüm. Heç xırıldamadan nəfəsi kəsildi. Boğucu fənd zamanı həmin adamı vaxtında ayıltmayanda ölür. Bunu idman zamanı öyrənmişdim.

Qətldən sonra izi itirmək üçün evi yandırmaq qərarına gəldim. Ütülənmək üçün yığılan paltarlara oradakı alışqanla od vurdum. Meyit qonaq otağından yataq otağına açılan qapının ağzında idi. Yandırdığım paltarlar meyitdən təxminən metr yarım aralıydı. Məqsədim meyiti yox, ümumi evi yandırmaq idi.

Paltarları yandırandan sonra evdən çıxmaq istəyəndə Aytənin telefonunu zaldakı kreslonun yuxarı hissəsində toka taxılı vəziyyətdə gördüm. Telefonu şnurla çıxaranda baş hissəsi "rozetka"da, yəni elektrik yuvasında qaldı. Telefonu şnur qarışıq odun içinə atdım ki, yanıb məhv olsun.

Tələsik evdən çıxaraq qapını örtdüm və tez həyətə düşdüm. Piyada aşağı düşəndə arxadan, üzbəüz mənzildə yaşayan rus milliyətindən olan qadının “nə səs-küy salırsan” sözlərini eşitdim. Həyətdə qaça-qaça yeznəm Səmədin maşınına tərəf getdim. Maşına oturaraq ona “sür qabağa, sağa dön, zibbilliyin yanında saxla, pəncərəyə baxım” dedim.

Səməd məndən pəncərəyə baxmağımın səbəbini soruşdu. Ona dedim ki, qapını döydüm açmadı, baxıram görüm evdədir, yoxsa yox. Əslində məqsədim o idi ki, görüm, pəncərədən alov çıxır, yoxsa yox. Maşının salonundan boylanıb baxanda hələ alov gözə dəymirdi. Ona görə Səmədə dedim ki, qəsəbənin içində bir qədər fırlanaq, sonra evə gedək. O da bir söz demədən maşını sürüb mərkəzə getdik. Yanacaq doldurma məntəqəsində yanacaq vurandan sonra evə qayıtdıq”.

“Dedi ki, ev qazdan partlayıb”

İsmayıl qeyd edib ki, daha Aytənin evinə tərəf qayıtmayıb: “Düşündüm ki, Səməd nəsə görüb başa düşər. Baş verənlər barədə evdə heç kimə heç nə demədim. Səhərisi gün həyat yoldaşım və uşaqlarımla Mehdiabad qəsəbəsində olan evimizə getdik. Bizi evə Səməd apardı.

Günorta vaxtları polis əməkdaşları Səmədin telefonuna zəng edərək onun maşınının farası ilə maraqlandılar, bak yerində qapaq olub-olmadığını soruşdular. Səməd bundan sonra “qəsəbədə nəsə olub, ola bilsin, qəza baş verib, qaçıblar, “Nexia” maşını axtarırlar” dedi. Səmədin də maşını “Nexia” markalı idi.

Səməd “maşının yanacaq doldurulan bakının qapağı rəngə görə çıxarılıb, onu yerinə salmaq lazımdır” dedi. Məhlədə Səməd özü maşının benzin bakının qapağını yerinə bağladıqdan sonra getdi. Aradan 2-3 saat keçmiş Səməd ailəsi ilə qayıdaraq bizə gəldi. Məndən soruşdu ki, sən əvvəlki gün getdiyin binada hansı mərtəbəyə çıxmışdın? Bildirdim kui, biz ora axşam getmişik, hadisə isə səhər olubdur, narahat olma.

Ona qədər artıq qardaşım Vəlidən Aytənin evinin yandığını eşitmişdim. Qardaşıma həmin binada yaşayan Daşqın adlı dostu demişdi ki, Aytən müəllimənin evi qazdan partlayıb, özü də reanimasiyadadır. Ona görə Səməd məndən soruşanda artıq evin yanmasından xəbərim vardı”.

İsmayıl deyib ki, mayın 26-da Qaradağ Rayon Polis İdarəsinin əməkdaşları gələrək onu polisə aparıblar: “Artıq nəyisə gizlətməyin mənasız olduğunu başa düşdüm. Hadisə barədə həqiqətləri olduğu kimi danışdım”.

Bu cinayət işinə Bakı Ağır Cinayətlər Məhkəməsində baxılıb. Məhkəmənin hökmü ilə İsmayıl 18 il azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.