“Ağ babanın nağılı”nda nələr olacaq?

Kukla Teatrında daha bir maraqlı səhnə əsəri balaca teatrsevərlərin ixtiyarına verilib.

Teleqraf.com xəbər verir ki, məşhur Azərbaycan xalq nağılı “Qoca ilə Şir“in motivləri əsasında səhnələşdirilən tamaşa “Ağ babanın nağılı” adlanır.

Birhissəli uşaq tamaşası özünün maraqlı mövzu və ideyası ilə seçilir. Güc tətbiqindən öncə ağılın qələbəsindən danışan tamaşada humanizm və məntiqin vacibliyi ana xətt təşkil edir. Komik epizodlar fonunda cərəyan edən hadisələr sonda ağlın güc üzərində qələbəsi ilə nəticələnir. Tamaşa uşaqlara dürüstlük, mübarizlik və sədaqət kimi ali insani dəyərlər aşılayır.

Teatrın baş rejissoru Qurban Məsimov, quruluşçu rəssamı İqbal Əliyev, bəstəkarı Anar Hüseynlidir. Obrazları isə əməkdar artist Rəhman Rəhmanov, aktyorlar Cavid İbrahimov, Elnur Abbasquliyev, Rəhilə İbadova, Samirə Nəcəfova, Elnur Xəlilov, Firuzə Nəsibli ifa edirlər.

Nərmin