Bakıda musiqi müsabiqəsi keçiriləcək

Bakı İslam dünyası gənc klassik musiqi ifaçılarının beynəlxalq festival-müsabiqəsinə beşinci dəfə ev sahibliyi edəcək.

Belə ki, aprelin 18-dən 22-dək paytaxtımızda ISESCO və Azərbaycan Respublikası Gənclər və İdman Nazirliyinin dəstəyi, Üzeyir Hacıbəyli adına Bakı Musiqi Akademiyasının iştirakı ilə “Kainat” Gənclik Mərkəzinin təşkil etdiyi İslam dünyası gənc klassik musiqi ifaçılarının V Beynəlxalq müsabiqəsi keçiriləcək.
Təşkilat komitəsindən bildirilib ki, müsabiqədə kiçik (15 yaşadək) və böyük (16-20 yaş) yaş qrupları ilə təmsil olunan ölkələrin gənc istedadlarının çıxışları beynəlxalq tərkibli münsiflər heyəti tərəfindən qiymətləndiriləcək. Müsabiqənin sonunda qaliblərin mükafatlandırılması mərasimi və qala-konsert təşkil olunacaq.

Dostluq ruhunun hakim kəsildiyi əsl musiqi bayramına çevrilən beynəlxalq festival-müsabiqə müxtəlif ölkələrdən istedadlı gənc musiqiçiləri öz ətrafında toplayaraq, onların peşəkar yüksəlişinə, təcrübə mübadiləsinə zəmin yaradır, mədəni əlaqələrinin möhkəmlənməsinə töhfə verir. Belə nüfuzlu müsabiqədə iştirak iştirakçıların yaddaşında dərin iz buraxır.