Səngər stendi yarışlarının yarımfinalçıları müəyyənləşib - YENİLƏNİB

Qarışıq komanda halında səngər stendi yarışının finalçıları müəyyən olunub.

Qızıl medal uğrunda Slovakiya və Rusiya komandaları mübarizə aparacaq.

Bürünc medal uğrunda görüşdə isə İspaniya və San Marino komandaları qarşılaşacaq.

15.58

Qarışıq komandalar arasında səngər stendi yarışlarının yarımfinalçıları müəyyənləşib.

Yarımfinal mərhələsində 6 komanda - İspaniya, İtaliya, Slovakiya, Fransa, Rusiya və San-Marino mübarizə aparacaq.

Azərbaycan idmançıları Elvin İsmayılov və Alina Rafiqxanova qarışıq komandaların səngər stendi yarışının təsnifat mərhələsində mübarizəni dayandırıblar.

14:44

Sonra qaliblər mükafatlandırılıb.

Medalları atletlərə Avropa Atıcılıq Konfederasiyasının prezidenti Vladimir Lisin təqdim edib.

14:19

Kişilər arasında 50 metr məsafədən uzanaraq tüfənglə atəşaçma yarışının qalibi Almaniya idmançısı Henri Yunqhaene olub. O, qızıl medal uğrunda mübarizədə rəqiblərinə üstün gələrək 208.5 xalla birinciliyi təmin edib. İdmançı “Rio-2016” Yay Olimpiya Oyunlarında iştirak hüququ qazanıb.

İkinci yerə italiyalı De Nikolo Marko, üçüncü yerə isə belaruslu Sergey Martinov çıxıblar.

13:12

Artıq kişilər arasında 50 metr məsafədən uzanaraq tüfənglə atəşaçma yarışının finalçıları məlum olub.

İsrailli Quy Sratik, norveçli Brekne Odd Arne, italiyalı De Nikolo Marko, almaniyalı Henri Yunqhaenel, xorvatiyalı Bojan Durkoviç, finlandiyalı Juho Kurki, estoniyalı Meelis Kiisk və belaruslu Sergey Martinov adlarını finala yazdırmağı bacarıblar.

11:46

Qarışıq komanda halında səngər stendi və kişilər arasında 50 metr məsafədən uzanaraq tüfəng ilə atəşaçma yarışlarının təsnifat mərhələləri keçirilir.

Kişilər arasında 50 metr məsafədən uzanaraq tüfənglə atəş açma yarışında 37 idmançı mübarizə aparır. Bu yarışda Azərbaycan idmançıları iştirak etmirlər.

11:13

İyunun 18-də Bakı Atıcılıq Mərkəzində birinci Avropa Oyunlarının atıcılıq yarışlarının üçüncü gününə start verilib.

AZƏRTAC xəbər verir ki, yarışın üçüncü günündə qarışıq komandaların səngər stendi, kişilər arasında 50 metr məsafədən uzanaraq tüfəng ilə atəşaçma üzrə mübarizə aparılır.

Qarışıq komandaların səngər stendi yarışında Azərbaycanı Elvin İsmayılov və Alina Rafiqxanova təmsil edirlər.