7 İyul 2015 13:28
1 041
12 Punto 14 Punto 16 Punto 18 Punto

Bu gün Gənclər və İdman Nazirliyinin binasında “Bakı -2015” I Avropa Oyunlarında medal qazanmış karateçilərlə görüş keçirilib.

Publika.az xəbər verir ki, görüşdə nazirliyin rəsmi nümayəndəsi Mirkamil Rəhimov, Azərbaycan Karate Federasiyasının prezidenti Yaşar Bəşirov, baş məşqçi Rəhman Hətəmov və medal qazanmış idmançılar iştirak edib.

Tədbiri giriş sözüylə açan Y. Bəşirov Azərbaycanın idman ölkəsi kimi bütün dünyada tanındığını bildirib. Onun sözlərinə görə, Açılış və Bağlanış mərasimləriylə yanaşı, idmançıların çıxışı da yüksək səviyyədə olub: "Bildiyimiz kimi, əvvəlcə karateçilər yarışa qatıldı. İlk medal İlahə Qasımovanın adına yazıldı. Rafael Ağayev də öz sözünü dedi və dünyada bir nömrə olaraq qaldı. 21 dəfə Bakıda himnimiz səsləndi və bundan gözəl hədiyyə ola bilməz".

Federasiya prezidenti idmançıların belə yüksək səviyyədə çıxış edəcəyini gözləmədiklərini deyib. O qarşıdan gələn yarışlar haqda da məlumat verib: "Payız ayında İndoneziyada gənclər və yeniyetmələrin dünya çempionatı var və biz ora qatılacağıq. Ola bilsin ki, həmin gənclərdən İslam Oyunlarında da çıxış edəni olsun. Həmişə çətin anda nazir Azad Rəhimova müraciət etmişik və o da bizə kömək edib. Gələn aydan hazırlıqlar başlayacaq".

Y.Bəşirov digər federasiyaların onların adından çıxış etməsinə də münasibət bildirib: “Xahiş edirəm heç kim bizim nəticələri başqa federasiyaların adına yazmasın. Rəsmi olaraq Beynəlxalq Olimpiya Komitəsi tərəfindən tanınan bizik. Hər il nəticələrimiz artır və gələcəkdə də buna davam edəcəyik".

Qeyd edək ki, "Bakı 2015" I Avropa Oyunlarında Azərbaycan karateçiləri 4 qızıl və 2 bürünc medal qazanıblar.


Müəllif: