Tramp Kim Çen Ina Elton Conun diskini göndərdi – Raket insan

Pxenyanda səfərdə olan ABŞ dövlət katibi Mayk Pompeo Koreya Xalq Demokratik Respublikasının lideri Kim Çen Ina prezident Donald Trampın qeyri-adi hədiyyəsini aparıb.

Teleqraf.com-un məlumatına görə, Cənubi Koreyanın “Chosun Ilbo” nəşri Trampın Kim Çen Ina müğənni Elton Conun diskini hədiyyə göndərdiyini yazıb. Nəşr Vaşinqtonda diplomatik mənbələrə istinadla qeyd edib ki, diskdə britaniyalı müğənninin “Raket insan” (Rocket Man) mahnısı yer alıb. Məlumata görə, “Rocket Man” diski Kimlə Trampın birgə naharı zamanı müzakirələrin predmeti olub.

“Kim Çen In Trampın keçən il onu “Raket insan” adlandırmasını xatırladıb. Tramp isə cavabında Kim Çeni Indan Elton Conunun eyniadlı mahnısını bilib-bilmədiyini soruşub. Şimali Koreya lideri isə “yox” cavabını verib”, - deyə nəşr qeyd edib.

Tramp Kim Çen Inla dialoqu xatırlayaraq Pompeoya Elton Conun diskini Şimali Koreya liderinə çatdırmağı xahiş edib.

ABŞ prezidenti imzaladığı disklə yanaşı Kim Çenə məktub da göndərib.

Xatırladaq ki, Avqustun 26-da Şimali Koreya sahillərindən Yapon dənizi istiqamətinə bir neçə kiçik məsafəli raket atılan zaman Donald Tramp özünün Tvitter hesabında KXDR lideri Kim Çen Inı “Raket insan” adlandırmışdı. “Dünən Cənubi Koreyanın prezidenti Munla danışdım. “Raket insan”ın necə yaşadığını soruşdum. Şimali Koreyada yanacağa görə uzun növbələr yaranıb. Pisdir”, - deyə yazmışdı.