Yunanıstan və İsrail arasında 20 illik saziş imzalandı – Tarixin ən böyük hərbi anlaşması

İki ölkə arasındakı razılaşmaya əsasən, İsrail şirkəti Yunanıstan Hava Qüvvələri üçün hərbi təyyarəçilik məktəbi inşa edəcək və Təl-Əviv Afinaya 10 ədəd “M-346” təlim təyyarəsi verəcək.

Teleqraf.com xəbər verir ki, İsrail Müdafiə Nazirliyi Afinanın Təl-Əvivlə 20 illik 1.68 milyard dollarlıq anlaşmasını təsdiqlədiyini açıqlayıb.

Razılaşmaya əsasən, İsrailin müdafiə sənayesi şirkəti “Elbit Systems” Yunanıstan Hava Qüvvələri üçün təyyarəçilik məktəbi inşa edəcək.

Hərbi sazişdə İsrailin Yunanıstana 10 ədəd “M-346” təlim təyyarəsi satması, “T-6 Efroni” təyyarələrinə texniki xidmət və “Elbit Systems” tərəfindən simulyatorlara dəstək kimi müddəalar yer alıb.

Yunanıstanın təsdiqlədiyi 20 illik müqavilənin iki ölkə arasında bu günə qədər imzalanmış ən böyük müdafiə müqaviləsi olduğu bildirilib.

Sazişin imzalanma tarixi barədə heç bir məlumat verilməsə də, İsrail Müdafiə naziri Benni Qantz müqavilənin İsrail və Yunanıstan arasındakı münasibətlərin yüksək səviyyədə inkişaf etdiyini göstərdiyini deyib.