Rus ordusunun Kiyevə uğursuz hücumu – Bir kolon texnikası məhv edildi

Ən şiddətli döyüşlər İvankov yaxınlığında, eləcə də Kiyev vilayətinin Qostomel, Vorzel və Buça şəhərlərində gedir.

Teleqraf.com xəbər verir ki, bu barədə Ukrayna prezident aparatının rəhbərinin müşaviri Aleksey Arestoviç məlumat verib.

“Ən böyük təhlükə İvankov şəhəri hissəsində - Kiyevin şimal-qərbində inkişaf edir. Qostomel, Vorzel və Buça yaşayış məntəqələrində döyüşlər gedir”, - o bildirib.

Onun sözlərinə görə, hazırda düşmən bu ərazilərdə hücuma keçməyə çalışır, amma Ukrayna hərbi hava-desant bölmələri etibarlı sədd qurub və düşmənin bir neçə helikopterini və ən azı bir kolon hərbi texnikasını məhv edib:

“Çerniqov vilayətində qoşunlarımız düşmənin qarşısını alıblar. Hazırda orada heç bir aktiv tədbir görülmür. Sumi rayonunda da belədir. Düşmən yenidən qruplaşır və növbəti hücuma cəhd etməyə hazırlaşır, amma etibarlı müdafiəmiz var.

Xarkov saxlanılır. Şəhərin müdafiəçiləri səhər saatlarında növbəti hücumu dəf ediblər.

Melitopolun kənarında Krımın işğalında iştirak etmiş rus hərbçiləri var, amma şəhərin qalan hissəsi müdafiəni əlində saxlayan və Mariupola doğru irəliləməyə imkan verməyən Ukrayna hərbçilərinin əlindədir.

Xerson yaxınlığında rus qoşunları Müqəddəs Endryu körpüsü dağıdılandan sonra Dneprdən keçməyin yollarını axtarır. Qoşunlarımız sağ sahildə müdafiə olunur”.