Əvvəl təriflədi, sonra Ərdoğanın bu sözünü xatırlatdı – “Qoyun belə güdə bilməz”

CHP sədri və Türkiyə müxalifətinin (Millət İttifaqının) prezidentliyə namizədi Kamal Kılıçdaroğlu İngiltərənin BBC telekanalına müsahibə verib.

Teleqraf.com xəbər verir ki, Kılıçdaroğlu Prezident Rəcəb Tayyib Ərdoğanın seçkiləri uduzacağı təqdirdə “səssizcə geri addım” atacağını və kiminsə narahat olmasına lüzum görmədiyini deyib.

CHP lideri seçiləcəyi təqdirdə Qərblə əlaqələrə diqqət yetirəcəyini söyləyib.

“Türkiyə öz kursunu yenidən təyin edəcək”, - Kılıçdaroğlu vurğulayıb. Rusiya ilə deyil, Qərblə münasibətlərə üstünlük verəcəyini də sözlərinə əlavə edib.

BBC Kamal Kılıçdaroğlu ilə bağlı bu ifadələrə yer verib: “Bir çox cəhətdən Ərdoğan əleyhdarıdır. Arxa planda səliqəli şəkildə asılmış mətbəx dəsmalları ilə təvazökar mətbəx masasında kampaniya videoları çəkir”.

Xəbərdə Prezident Ərdoğanın Kılıçdaroğlu üçün işlətdiyi “Qoyun belə güdə bilməz” sözləri də yer alıb.