Təyyarə qəzasında 10 nəfər öldü

İspaniyanın Los Lyanosdakı hərbi bazasında Yunanıstana məxsus qırıcı təyyarəsinin qəzaya uğraması nəticəsində 2 yunan pilotu və 8 Fransa vətəndaşı ölüb.

Teleqraf.com-un "RİA Novosti" agentliyinə istinadən verdiyi xəbərə görə, bu barədə İspaniyanın baş naziri Mariano Rahoy bildirib.

Onun sözlərinə görə, qırıcının yerə düşməsi nəticəsində 10 Fransa və 11 İtaliya hərbçisi xəsarət alıb. M.Rahoy qeyd edib ki, Fransa və İtaliyanın müdafiə nazirləri hadisə yerinə yollanacaqlar.

Qeyd edək ki, yanvarın 26-da İspaniyada Los Lyanos şəhəri yaxınlığındakı hərbi bazada Yunanıstana məxsus F-16 qırıcı təyyarəsi qəzaya uğrayıb. Yanvarın 19-dan fevralın 13-dək nəzərdə tutulmuş NATO-nun “Tactical Leadership Programme” proqramı çərçivəsində keçirilən təlimlərdə 9 ölkəni (Yunanıstan, Belçika, Danimarka, Fransa, Almaniya, Böyük Britaniya, İtaliya, İspaniya, ABŞ) təmsil edən 750 hərbi qulluqçu iştirak edir.