“Putinlə yaxşı anlaşıram, müharibəni bitirəcəm” - Tramp

Rusiya Prezidenti Vladimir Putinlə çox yaxşı anlaşıram.

Teleqraf.com xəbər verir ki, bunu Respublikaçılar Partiyasından ABŞ prezidentliyinə namizəd Donald Tramp deyib.

Tramp Rusiya lideri ilə yaxşı münasibətlərinin olduğunu söyləyib və qeyd edib ki, onun prezidentliyi dövründə Ukrayna heç vaxt işğal edilə bilməzdi.

Prezidentliyə namizəd Putinin ona Ukraynanı işğal edəcəyi barədə xəbərdarlıq etdiyini də açıqlayıb: “Bu haqda danışdı, amma buna getməməyi bildirdim”.

Tramp əmindir ki, Putin bunu yalnız hazırkı Prezident Co Baydenə görə etməyə cürət edib. ABŞ-ın keçmiş lideri Ukrayna Prezidenti Vladimir Zelenski ilə də yaxşı münasibətdə olduğunu vurğulayıb və seçiləndən sonra Şərqi Avropada müharibəyə son qoyacağını deyib.

“Bayden bununla bağlı heç nə etmədi, bir ildən çox Putinlə belə danışmadı. Bu, bitməli olan müharibədir və mən bu müharibəni bitirəcəm. Seçilmiş prezident kimi bu müharibəni bitirməyə çalışacam. Sadəcə insanların ölməsini dayandırmaq istəyirəm”, - Donald Tramp vurğulayıb.