19 Fevral 2016 02:34
679
12 Punto 14 Punto 16 Punto 18 Punto

Rusiyanın paytaxtı Moskvada azərbaycanlıların çalışdığı ticarət mərkəzində güclü yanğın baş verib.

Hadisə paytaxtın “Savelovsk” metro stansiyasının yaxınlığında yerləşən eyniadlı bazarda baş verib.

Mərkəzdə əsasən azərbaycanlılar çalışır və onlar paltar alveri ilə məşğuldur. Yanğın nəticəsində həmyerlilərimizə məxsus olan təxminən iyirmiyə yaxın konteyner yanıb. Yanğın nəticəsində bütün satılan mallar yanıb. Yerdə qalan mallar isə su altında qalaraq yararsız hala düşüb. Bazarda çalışan azərbaycanlılar külli miqdarda ziyana düşdüklərini qeyd ediblər.

“Bütün mallarımız yandı. Heç nə götürə bilmədik. Qalan malımız da yanğınsöndürənlərin buraxdığı suyun altında qaldı. Yanğının qəsdən törədildiyini ehtimal etmirik. Bu hadisədən sonra bazar bağlanacaq. Burada bir neçə dəfə belə hadisə baş verib. Daha sonra həmin yer bağlanıb. Mənim kimi bir çoxlarına ciddi ziyan dəyib”, - deyə bazarda çalışan həmyerlimiz Sadiq Heydərov bildirib.

Yanğın zamanı bazarda çalışanlar dərhal təxliyə olunub. Hadisə yerinə xilasedici qrup, yanğınsöndürənlər, polis və Federal Təhlükəsizlik Xidmətinin əməkdaşları cəlb edilib. Hadisə nəticəsində xəsarət alan olmayıb. Yanğının səbəbləri barədə açıqlama verilmir.

Rusiyada bazarlarda yanğın ilk dəfə deyil. Son dəfə olaraq Kazanda azərbaycanlı iş adamına məxsus "Admiral" ticarət mərkəzində güclü yanğın olmuşdu. Məlumata görə, hadisə nəticəsində 5 nəfər ölmüş, onlarla insan yaralanmışdı. Onların arasında azərbaycanlılar da var idi. Ticarət Mərkəzinin direktoru Hüseyn Qəhrəmanov isə aparılan istintaq çərçivəsində saxlanılıb. (ANSPRESS)


Müəllif: