Məktəblərdə kütləvi yoluxma qeydə alınmayıb, amma... - Təhsil naziri

Biz təhsil müəssisələrində tətil elan etmişik, karantin rejimi yox.

Teleqraf.com xəbər verir ki, bunu Təhsil naziri Emin Əmrullayev bu gün keçirilən brifinqdə deyib:

"Bu halda tədris müəssisələrində tədris aparılmır. Təhsil müəssisələrində 9 günlük tətil ənənəvi qaydada müəyyən olunub və hazırda həmin tətil günlərinin vaxtı əvəzlənib.

Əvvəlki dövrlərlə müqayisədə son günlərdə virusun yayılma sürəti artıb. 1221 məktəbdə, Gəncə, Naftalan, Ağcəbədi, Ağstafa, Bərdə, Füzuli, Gədəbəy, Cəbrayıl, Bərdə və digər cəbhəyanı bölgələrdə təxribatla əlaqədar tədrisi bərpa edə bilmirik.

Bakı və Abşeron isə insanların sıx toplaşdığı yerdir. Hazırda şagirdlər arasında kütləvi yoluxma halları qeydə alınmayıb. Lakin onların ictimai nəqliyyatdan istifadə etməsi yolxuma hallarının artmasına səbəb ola bilər.

Düşünürəm ki, hazırkı şəraitdə ən doğru qərar qəbul edilib. Oktyabr ayının son həftəsində distant təhsillə bağlı ictimaiyyətə məlumat veriləcək.

Qısa zaman ərzində ordumuzun apardığı zəfər yürüyüşü uğurla nəticələnəcək. Bu tətil noyabrda olan tətili əvəzləyir və buraxılan dərsləri kompensasiya ediləcək".