“Ötən il 160-a yaxın layihə reallaşdırmışıq”

İntiqam Babayev: “Gənclər siyasəti sahəsində həyata keçirilən tədbirlər çoxsaylı və rəngarəng olub”

“Artıq Azərbaycanda bir ənənədir ki, biz hər ili çox məhsuldar başa vururuq. Təbii ki, 2014-cü ildə digər sahələrdə olduğu kimi gənclərlə iş sahəsində də bizim kifayət qədər uğurlarımız və nailiyyətlərimiz var”.

Teleqraf.com-un məlumatına görə, bu sözləri gənclər və idman nazirinin müavini İntiqam Babayev deyib.
İ.Babayev bildirib ki, 2014-cü il ərzində gənclər siyasəti ilə əlaqədar müxtəlif səviyyəli tədbirlər həyata keçirilib. Onun sözlərinə görə, gənclərin inkişafı, onların ictimai həyatda daha fəal təmsilçiliyi, beynəlxalq əlaqələrin qurulması və sair baxımdan il ərzində təxminən 160-a yaxın layihə reallaşdırılıb.

“Bunların sırasında 40-a yaxını beynəlxalq tədbirlərdir. Bu il ərzində təxminən 3 minə yaxın gənc keçirilən mübadilə layihələrində iştirak etmək imkanı əldə edib. Azərbaycanda ilk dəfə olaraq 2014-cü ildə dünyada birinci Bakı Qlobal Gənclər Forumu keçirildi. Həmin forumun Azərbaycanda keçirilməsi düşünürəm ki, ölkəmizdə bu günə qədər gənclər siyasəti sahəsində əldə olunan nailiyyətlərə verilən bir qiymətdir. 165 ölkənin nümayəndəsi Azərbaycana gəldi və bu tədbirlərdə iştirak etdi. İştirak edən insanların əksəriyyəti isə Azərbaycanın gənclər siyasəti sahəsində olan təcrübəsindən yararlanmasını xüsusilə qeyd etdilər. Ötən il, həmçinin, 21 ölkədə müsabiqə keçirdik və nəticə olaraq bu müsabiqələrdə qalib gəlmiş 174 gəncin müxtəlif ölkələrdən Azərbaycana səfərini təşkil olundu. Hesab edirəm ki, gənclər siyasəti sahəsində həyata keçirilən tədbirlər çoxsaylı və rəngarəng olub. 2015-ci il isə artıq yeni hədəflər, vəzifələr bizi gözləyir. Düşünürəm ki, biz onları da çox uğurla başa çatdıracağıq” – deyə, nazir müavini vurğulayıb.

Səxavət