Türklərin ən az tanınan tarixi dövləti – 2000 illik sirr tapılan xəzinə ilə açıldı

Arxeoloqlar Qazaxıstanın Türküstan vilayətində təxminən 2000 il yaşı olan kurqanlarda qızıl bəzək əşyaları, ox ucları və böyük tunc güzgü aşkar ediblər.

Teleqraf.com xəbər verir ki, artefaktların e.ə. əvvəl V əsrdən eramızın IV əsrinə qədər bölgəni idarə edən Xanju dövləti dövrünə aid olduğu güman edilir.

Arxeoloqlara görə, tapıntılar qədim Roma, Çin və Kuşan İmperiyası ilə ticarət edən Xanju dövlətinin yüksək səviyyədə inkişaf etmiş sənətkarlıq sənayesini göstərir.

Tunc güzgünün e.ə. 206-cı ildən bizim eranın 220-ci ilinədək hökm sürən Xan sülaləsi dövründə Çindən gətirildiyi güman edilir. Oxşar güzgülər Əfqanıstan və Cənubi Uralda da tapılıb. Belə əşyalar bunlarla birgə dəfn edilən insanların varlı və nüfuzlu olduqlarına işarədir.

Qazaxıstanın Özbəkali Janibekov Universitetinin komandasına görə, bölgədə aşkar edilən üç kurqandan ikisi qədim zamanlarda qarət edilsə də, birindən qiymətli əşyalar tapılıb.

Bürünc güzgüdən başqa, artefaktlar arasında Roma üslubunda fibula (broş), iri və kiçik muncuqlar, gil küp, ayaqqabı, kəmər tokası, ox ucluğu və e.ə. I əsrə aid olduğu güman edilən iki qızıl sırğa aşkarlanıb.

Arxeoloq Aleksandr Poduşkin deyir ki, Xanju dövləti müxtəlif xalqlar, o cümlədən köçəri sarmat, hunlar və sak tayfalarının federasiyası olub.

Xanju şəhərlərinin Çin və Aralıq dənizi arasında yerləşən Böyük İpək Yolunun qolları üzərində yerləşməsi bütün qədim dünya ilə diplomatik və ticarət əlaqələrinin olması demək idi.