23 Fevral 20:25
19 404
12 Punto 14 Punto 16 Punto 18 Punto

Çinin nüfuzlu “Asia Times” qəzeti Türkiyənin ilk 5-ci nəsil KAAN döyüş təyyarəsindən yazıb.

Teleqraf.com xəbər verir ki, “Türkiyənin yeni təyyarəsi qlobal bazarı alt-üst edəcək” adlı məqaləsində çinli müəllif sözügedən qırıcının ABŞ F-35-lərinə ciddi rəqib olacağını bildirir.

“İlk uçuşunu uğurla reallaşdıran yeni nəsil döyüş təyyarəsi KAAN ABŞ-yə yuxarıdan aşağı baxır, böyük ehtimalla, F-35-in müştərilərini ovlayacaq”, - məqalədə deyilir.

KAAN-ın Türkiyənin hərbi aviasiya sənayesinin flaqmanı olacağını yazan “Asia Times” təyyarənin F-16 donanmasını əvəz etməyə hazırlaşdığını da iddia edir:

“2016-cı ildə başlanan KAAN layihəsi Türkiyənin 2030-cu illərdən etibarən arsenaldan çıxarılacaq ABŞ istehsalı F-16 donanmasının yerini almağı hədəfləyir. KAAN fəlsəfəsi Türkiyə 2019-cu ildə Rusiyadan S-400 müdafiə sistemi aldıqdan sonra ABŞ-nin rəhbərlik etdiyi F-35 konsorsiumunu tərk etdikdən sonra inkişaf edib.

KAAN Türkiyənin hərbi aviasiya sənayesinin flaqmanı olacaq. Ölkədə yerli reaktiv mühərriklərin istehsalı layihəsi üzərində iş aparılır, onun süni intellektlə dəstəklənən dizaynı və imkanları 6-cı nəsil döyüş təyyarəsi üçün nəzərdə tutulur”.

KAAN-ın texniki xüsusiyyətlərinin yer aldığı məqalədə ilk potensial müştərilər arasında Azərbaycanın da adı çəkilir:

“Çox güman ki, Türkiyə KAAN-ı qlobal döyüş təyyarələri bazarına çıxarmağı hədəfləyir. Potensial müştərilər kimi çoxdankı strateji tərəfdaş Azərbaycanla yanaşı, BƏƏ, İndoneziya və Pakistan da göstərilir”.


Müəllif: Mənsur Rəğbətoğlu