19 Aprel 13:03
381
12 Punto 14 Punto 16 Punto 18 Punto

"Elm və Təfəkkür Universiteti”nin prorektoru Tariyel Əhmədovun öldürülməsində təqsirləndirilən həmin universitetin rektoru Müşfiq Atakişiyev, Dəyanət Quliyev və Samir Quliyevin cinayət işi üzrə məhkəmə prosesi keçirilib.

Teleqraf.com xəbər verir ki, Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən iclasda təqsirləndirilən Dəyanət Quliyevin vəkili Ramiz Qarayev müdafiə çıxışı edib.

O bildirib ki, müvəkkili dayısı Müşfiq Atakişiyev tərəfindən Tariyel Əhmədovun öldürməsi barədə sifariş almadığını deyib. Vəkil qeyd edib ki, Dəyanət Quliyev hüquq-mühafizə orqanlarına təslim olub. Vəkil müvəkkilinə ədalətli qərar qəbul edilməsini xahiş edib.

Digər təqsirləndirilən Samir Quliyevin vəkili Səfər Hüseynov bildirib ki, müdafiə etdiyi şəxs cinayəti etiraf edib. Vəkil buna görə də ona ittiham olunduğu Cinayət Məcəlləsinin sanksiyasında nəzərdə tutulmuş cəzanın aşağı həddində cəza təyin edilməsini istəyib.

Təqsirləndirilən Müşfiq Atakişiyevin vəkili Kamran Əliyev qeyd edib ki, müvəkkili elan olunan ittiham üzrə özünü təqsirli bilməyib.

Vəkil deyib ki, sabiq rektor Tariyel Əhmədovun qətlini sifariş verməyib, bu hadisədən xəbəri olmayıb. Vəkil bildirib ki, Müşfiq Atakişiyevə əsassız, qərəzli olaraq ittiham verilib. Vəkil söyləyib ki, sabiq rektora törətmiş olduğu cinayətə görə cəza verilməlidir. O, Müşfiq Atakişiyevin ittiham olunduğu cinayət işi üzrə müddətin keçdiyi üçün işə xitam verilməsinin, Müşfiq Atakişiyevin məhkəmə zalından azad edilməsini istəyib.

Zərərçəkmiş şəxsin hüquqi varisi Zaur Əhmədov deyib ki, təqsirləndirilən şəxslərin hər üçü cinayəti etiraf edib. O, cəza təyin olunması məsələsini məhkəmənin mülahizəsinə verdiyi deyib.

Daha sonra təqsirləndirilən Müşfiq Atakişiyev son sözə hazırlaşmaq üçün vaxt istəyib. Hakim ona çıxış etmək üçün vaxt verildiyini deyib.

Digər təqsirləndirilən Dəyanət Quliyev son sözlə çıxış edib. O, özünü qismən təqsirli bilib. Samir Quliyev də özünü cinayət məcəlləsinin 120.1-ci maddəsi ilə təqsirli bildiyini söyləyib. Növbəti proses aprelin 26-da davam edəcək

Qeyd edək ki, bundan əvvəl çıxış edən prokuror təqsirləndirilən şəxslərin hər birinin 15 il müddətinə azadlıqdan mərhum edilməsini istəyib.

İttihama görə, “Elm və Təhsil Mərkəzi Təfəkkür Universiteti”nin prorektoru Tariyel Əhmədovun 16 sentyabr 2011-ci il tarixdə qəsdən öldürülməsi faktı ilə bağlı başlanmış cinayət işi üzrə həyata keçirilən istintaq-əməliyyat tədbirləri nəticəsində cinayəti törətməkdə təqsirləndirilən şəxslər ifşa edilib.

İbtidai istintaq zamanı həmin universitetin rektoru vəzifəsində işləmiş Müşviq Atakişiyevin Tariyel Əhmədovu öldürməyi qohumu Dəyanət Quliyevə sifariş verməsi, sifariş əsasında isə Samir Quliyevin cinayəti törətməsinə əsaslı şübhələr müəyyən edilib.

Toplanmış sübutlara əsasən rektor vəzifəsində qalmasına və işgüzar nüfuzuna maneə kimi qəbul etdiyi üçün Müşfiq Atakişiyevin qisas məqsədilə pul müqabilində zərərçəkmiş şəxs Tariyel Əhmədovun öldürülməsini öz qohumu Dəyanət Quliyevə sifariş verməsi, onun isə 40 min ABŞ dolları müqabilində, habelə gələcəkdə maddi və mənəvi dəstək olmaq şərtilə bu cinayəti sifariş verdiyi həmkəndlisi Samir Quliyevin bir neçə gün zərərçəkmişi izlədikdən sonra Bakı şəhəri, Yasamal rayonunun Şərifzadə küçəsində yerləşən idman meydançalarından birində küt əşya ilə bir neçə dəfə onun baş və bədəninin müxtəlif nahiyələrinə zərbələr endirərək ölümünə səbəb olan xəsarətlər yetirməsi müəyyən olunub.

İttihamda qeyd edilib ki, təqsirləndirilən Müşfiq Atakişiyev “Təfəkkür Universiteti”nin rektoru işləyərkən universitetin prorektoru Tariyel Əhmədovu özünə rəqib hesab edib, gələcəkdə onun rektor ola biləcəyini düşünüb.

Atakişiyev belə qənaətə gəlib ki, Əhmədovu aradan götürməklə işləri həll edə bilər. O, bu haqda bacısı oğlu, polis əməkdaşı Dəyanət Quliyevlə danışıb. O, Dəyananətə T.Əhmədovu maşınla və ya küt alətlə vurmağı tapşırıb.

Dəyanət Quliyev bundan sonra uşaqlıq dostu Samir Quliyevlə görüşüb, prorektoru öldürmək üçün ona 40 min dollar pul verib. Plana görə, prorektor səhər gəzintisinə çıxan vaxt Samir onu vurmalı idi.Samir Quliyev bir neçə gün izləmədən sonra səhər saat 4-5 radələrində gəzintiyə çıxan T.Əhmədovu tək yaxalayıb. O, əlindəki dəmir boru ilə bir neçə dəfə Əhmədovun baş nahiyəsindən güclü zərbə endirib, daha sonra cinayət alətini kimsəsiz əraziyə ataraq hadisə yerindən qaçıb.

Müşviq Atakişiyev və Dəyanət Quliyev Cinayət Məcəlləsinin 32.3, 120.2.5-ci (sifarişlə adam öldürmədə təşkilatçı), Samir Quliyev isə həmin Məcəllənin 120.2.5-ci (sifarişlə adam öldürmədə) maddəsilə təqsirləndirilən şəxs qismində cəlb ediliblər.

Məlum olub ki, təqsirləndirilən Dəyanət Quliyev hadisə vaxtı daxili işlər orqanlarında işləyib. O, 2000-ci ildən 2020-ci ilə kimi Binəqədi Rayon Polis İdarəsinin 7-ci Polis Şöbəsində əməliyyat müvəkkili işləyib. Samir Quliyev isə taksi fəaliyyəti ilə məşğul olub.
Həmçinin Müşfiq Atakişiyev Elm və Təhsil Nazirliyinin İqtisadiyyat İnstitutunun icraçı direktoru və həmin İqtisadiyyat İnstitutu nəzdində iqtisad elmləri sahəsində doktorluq dissertasiya şurasının sədri vəzifəsində çalışıb.

Qeyd edək ki, iqtisad elmləri doktoru, professor Müşviq Atakişiyev Təfəkkür Universitetinin rektoru olub.

Təfəkkür Universiteti 2017-ci ildə ləğv edilib.


Müəllif: Hacı Zeynalov