İsmayıllıda taksi sürücüsü baltalandı –TƏFƏRRÜAT

İsmayıllı rayonunda taksi sürücüsünə xəsarət yetirilib. Teleqraf.com xəbər verir ki, hadisə rayonda mərkəzi bazarın qarşısında qeydə alınıb.

Həmin ünvanda taksi fəaliyyəti ilə məşğul olan 1964-cü il təvəllüdlü Xəyalət Nəsirov həmkarı, 1964-cü il təvəllüdlü Ramil Nəcəfov ilə müştəri üstündə mübahisə edib. Taksiyə minmək üçün dayanacağa yaxınlaşan müştəri onlardan birinin avtomobilinə əyləşmək istəyib. Bu zaman taksi sürücüləri arasında müştərini aparmaq üstündə mübahisə yaranıb. Taksi sürücülərinin mübahisəsi sonda qanlı olayla nəticələnib. Ramil Nəcəfov avtomobilindən götürdüyü baltanı Xəyalət Nəsirovun başına vurub.

Ağır xəsarət alan Xəyalət Nəsirov xəstəxanaya yerləşdirilib. Ona tibbi yardım göstərilib, vəziyyətinin ağır olduğu bildirilir.

Hadisəni törədən Ramil Nəcəfov həbs edilib.

Faktla bağlı cinayət işi başlanıb.

Hacı Zeynalov