“Mehman Quliyevin yaşadığı evdən qumbara tapıldı” – Nardaran işində şahid

Bu gün Bakı Ağır Cinayətlər Məhkəməsində 2015-ci ilin oktyabr-noyabr aylarında Nardaran hadisələri ilə bağlı saxlanılan “Müsəlman Birliyi Hərəkatı” adlı təşkilatın üzvü Zülfüqar Mikayılov, Elman Ağayev, Faiq Allahverdiyev, Əli Hüseynov, Mehman Quliyev, Mehman Məmmədov, Eldar Bünyadov, Elxan Həsənov, Ramil Seyfullayev, Mübariz İbrahimov, Ruzi İsmayılov və Cabir Əliyevin cinayət işi üzrə məhkəmə prosesi keçirilib.

Teleqraf.com xəbər verir ki, hakim Zeynal Ağayevin sədrlik etdiyi prosesdə təqsirləndirilən Elxan Həsənovun vəkili Ramiz Məmmədov vəsatətlə çıxış edib.

O, hüquqlarını müdafiə etdiyi şəxs barəsində seçilmiş həbs qətimkan tədbirinin ev dustaqlığı ilə əvəz olunmasını istəyib. Məhkəmə vəsatəti təmin etməyib.

Daha sonra şahid qismində Baş Mütəşəkkil Cinayətkarlıqla Mübarizə İdarəsinin əməkdaşı İbrahim Kazımov ifadə verib.

İbrahim Kazımovun sözlərinə görə, təqsirləndirilən Faiq Allahverdiyevin evində axtarış aparıblar: “Faiq Allahverdiyev saxlanılarkən onun evindən qumbara və kitabça aşkar olundu”.

Baş Mütəşəkkil Cinayətkarlıqla Mübarizə İdarəsinin digər əməkdaşı Kamil Məmmədov bildirib ki, təqsirləndirilən Mehman Quliyevin yaşadığı evdən qumbara, 19 ədəd patron və Taleh Bağırovun kitabçası aşkar edilib.

Sonra idarənin əməkdaşı Mehman Teymurov dindirilib.

Proses mayın 1-də davam edəcək.

Hacı Zeynalov