“Rövşən Lənkəranski”nin mahnısına görə qətl... – Bakıda

Bakıda gecə klubunda müştərini qətlə yetirməkdə təqsirli bilinən1991-ci il təvəllüdlü Vüsal İbrahimovun birinci instansiya məhkəməsinin hökmündən verdiyi şikayət üzrə proses başa çatıb.

Teleqraf.com xəbər verir ki, Bakı Apelyasiya Məhkəməsində hakim İlqar Murquzovun sədrliyi ilə təqsirləndirilən şəxsin apelyasiya şikayətinin dəlilləri araşdırılıb.

İttihama görə, hadisə ötən il Nizami rayonu, “Neftçilər” metrostansiyası yaxınlığında yerləşən “Arbotaj” gecə klubunda baş verib. Vüsal İbrahimov işlədiyi barda mübahisə etdiyi müştəri, Tovuz rayon sakini, 1989-cu il təvəllüdlü Nurlan Atakişiyevi bıçaqlayıb. Nurlan Atakişiyev xəstəxanada dünyasını dəyişib.

Hadisənin barda mahnı üstündə baş verdiyi qeyd edilib.

Nurlan Atakişiyev spirtli içkinin təsiri altında olub və “oğru aləmi”nə məxsus mahnının çalınmasını tələb edib. Müştərinin sifariş verdiyi “oğru aləmi”nə məxsus mahnı “Rövşən Lənkəranski” ləqəbi ilə tanınan Rövşən Canıyevə aid olub.

Lakin “DJ” işləyən şəxs bu cür mahnıların çalınmasının bar rərbərliyi tərəfindən qadağan edildiyini deyib.

Bundan sonra Nurlan Atakişiyev barda çalışan Vüsal İbrahimovla mübahisə edib. Mübahisənin sonu qanlı hadisə ilə nəticələnib.

Bakı Ağır Cinayətlər Məhkəməsinin hökmü ilə o, 10 il 6 ay azadlıqdan məhrum edilib. Hökmdən narazı qalan şəxs və vəkili apelyasiya şikayəti verib.

Hakimlər kollegiyasının qərarına əsasən Vüsal İbrahimovun apelyasiya şikayəti təmin edilməyib.

Bakı Ağır Cinayətlər Məhkəməsinin hökmü dəyişdirilmədən saxlanılıb.