Öldürülən gəncin atası hökumətə vaxt qoydu

Tbilisidəki aksiyaların təşkilatçısı Zaza Saralidze Gürcüstan baş naziri Qeorqi Kvirikaşvili ilə keçirdiyi görüşlə bağlı açıqlama yayıb.

Teleqraf.com xəbər verir ki, oğlunu itirmiş valideyn hökumətə iyunun 10-a kimi vaxt verib.

"Əgər istintaq yekunlaşdırılmasa və canilər məsuliyyətə cəlb olunmasa hökumətinin istefası tələbi yenidən gündəmə gələcək", deyə Saralidze bildirib.

Qeyd edək ki, ötən ilin dekabrın 1-də Tbilisinin 51 saylı məktəbinin şagirdləri 16 yaşlı David Saralidze və Levan Dadunaşvili Xorava küçəsində mübahisə zamanı ölümcül bıçaq yaraları alıblar. Polis insidentdə şübhəli bilinən 2 yeniyetməni saxlayıb. Tbilisi şəhər məhkəməsi təqsirləndirilən şəxsləri qismən təqsirli hesab edib.