Qubada qızını qaçıran gənci öldürən ata həbs edildi – Qərar

Quba rayonunda qızını qaçıran gənci amansızlıqla öldürən Sadiq Dadaşovun barəsində həbs qətimkan tədbiri seçilib.

Teleqraf.com xəbər verir ki, Quba rayon Məhkəməsində hakim Xəqani Tağıyevin sədrliyi ilə baş tutan prosesdə müstəntiqin vəsatəti təmin olunub.

Sadiq Dadaşovun barəsində 3 ay müddətinə həbs qətimkan tədbiri seçilib.

Qeyd edək ki, bundan əvvəl Quba rayon sakini Elşad Əsədovun qətlində təqsirli bilinən Zabit Yolçuyev, Mətləb Muradov və Pərviz Əsədovun barəsində də 3 ay müddətinə həbs qətimkan tədbiri seçilib.

İstintaq orqanı tərəfindən təqsirli bilinən şəxslərin barəsində 120.2.1-ci (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə) və 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham elan edilib.

Qeyd edək ki, Quba rayon sakini Elşad Əsədovu qohumları – Sadiq Dadaşov, Elman Muradov və Mətləb Muradov tərəfindən döyülərək öldürülüb.

Hadisə qısqancliq zəminində baş verib.

Belə ki, Elşad Əsədov bir neçə gün əvvəl Sadiq Dadaşovun qızı Aynur Əsədovanı qaçırıb.

Bildirilir ki, Aynur Əsədova öz razılığı ilə Elşad Əsədov tərəfindən qaçırılıb.

Aynur Əsədova Elşad Əsədovun əmisinin gəlini olub.

Bu qaçırılma olayından sonra Sadiq Dadaşov, Elman Muradov və Mətləb Muradov Elşad Əsədovu tutublar, əvvəlcə onu döyüblər, sonra videoya çəkiblər. Ağır bədən xəsarəti alan Elşad Əsədov vəfat edib.

Cinayəti törədən şəxslər polis və prokurorluq əməkdaşları tərəfindən yaxalanıb.

Onu da əlavə edək ki, istintaq gedişi zamanı kəndin 100-ə yaxın sakini istintaqa cəlb olunub, dindirilib, saxlanılabnların sayının 10-a yaxın olduğu bildirilir.