"VAZ" markalı avtomobillər toqquşdu, yaralılar var

Göyçay rayonunda 3 nəfərin xəsarət alması ilə nəticələnən yol-nəqliyyat hadisəsi qeydə alınıb.

Hadisə Bakı-Ağsu-Yevlax avtomobil yolunun Göyçay rayonu ərazisindən keçən hissəsində baş verib. “VAZ 21099” markalı minik avtomobilinin qarşı tərəfdən gələn digər bir “VAZ” markalı minik avtomobili ilə toqquşması nəticəsində üç nəfər xəsarət alıb.

Göyçay Mərkəzi Rayon Xəstəxanasından verilən məlumata görə, qəza nəticəsində rayonun Ləkçiplaq kənd sakini, 1941-ci il təvəllüdlü Arif Məhəmməd oğlu İsmayılov, Şıxbəy kənd sakini, 1977-ci il təvəllüdlü Taleh Fazil oğlu Zalov və Ərəb kənd sakini, 1994-cü il təvəllüdlü Asif Asim oğlu Xəlilov müxtəlif dərəcəli bədən xəsarətləri ilə xəstəxanaya gətirilib:

"Yaralılardan Taleh Zalovun vəziyyəti ağırdır. Buna görə də onun üzərində cərrahiyyə əməliyyatı aparılıb. Arif İsmayılov da orta ağır olduğu üçün xəstəxanada müayinə edilir. Ancaq Asif Xəlilov ilkin tibbi yardım göstərildikdən sonra vəziyyəti yaxşı olduğu üçün evə buraxılıb", -deyə xəstəxanadan bildirdilər.

Faktla bağlı Baş Dövlət Yol Polisi İdarəsinin istintaq və təhqiqat şöbəsində araşdırma aparılır.

/Anspress/