Bu serial 2018-də başa çatacaq

Rekordları qıran fantastik dram serialı Game of Thrones (Taxt-tac Oyunu) səkkizinci mövsümdən sonra başa çatacaq, Amerikanın HBO teleşirkəti bildirib.

Teleqraf.com BBC-yə istinadən xəbər verir ki, HBO-nun proqram müdiri Casey Bloys bu barədə Televiziya Tənqidçiləri Assosiasiyasının konfransında danışıb.

Gələn ilin yayında nümayiş etdiriləcək 7-ci mövsüm, əvvəl nəzərdə tutulduğu kimi 10 deyil, 7 seriyadan ibarət olacaq. Son mövsüm isə 2018-ci ildə çəkiləcək.

Game of Thrones serialı George R R Martinin romanlarına əsasən çəkilir. Cənab Bloys bildirib ki, son mövsüm üçün nəzərdə tutulacaq epizodların sayı hələlik bəlli deyil.

"İstehsalçıların bizə təqdim edəcəyi bütün seriyaları alacağıq," o bildirib. Ötən il serial rekord sayda - 12 ədəd Emmy Mükafatı qazanıb.