Həmkarları İlham Əsgərovu Masallıda yad etdilər

Akademik Milli Dram Teatrının kollektivi bu gün Masallının Xoşçobanlı kəndində xalq artisti İlham Əsgərovun məzarını ziyarət ediblər.

Teleqraf.com xəbər verir ki, İlham Əsgərovun vəfatının bir ili tamam olur.

Aktyorun il mərasimi bu gün Masallıda keçirilib.

Bu haqda saytımıza açıqlamasında xalq artisti Nurəddin Mehdixanlı deyib: “Teatr rəhbərliyi avtobus ayırdı, kollektivdən aktyor-aktrisaların cəm olduğu bir heyətlə Masallıya, ordan da qəbirüstünə getdik. Birlikdə il mərasimində iştirak etdik.

Teatrın kollektivinin orda olması İlhamın ailəsinə böyük dəstək idi. Ora gedib, mərazını ziyarət etmək bizim borcumuz idi, borcu yerinə yetirdik, indisə qayıdırıq. Allah İlhama rəhmət eləsin, qalanlarının canını salamat eləsin.

İlham Əsgərov Azərbaycan teatrının çox gözəl aktyoru, gözəl, ləyaqətli siması idi. Amma nə edək ki, ömür bir yerdə qırılır.

Əgər İlham bu gün teatrda olan yaradıcı atmosferi, kollektivin mehribançılığını görsəydi, çox sevinərdi. Əslində indi kollektivdə belə bir mühit yaranıbsa bu, həm də İlham Əsgərovun xidmətidir. O bizim teatrımızın yolunda ömrünü verdi”.

İlham Əsgərov 2015-ci il sentyabr ayının 6-da 57 yaşında qəflətən vəfat edib.

Nərmin