22 İyun 2015 11:55
533

“Basketbol uşaqlıq arzum olub və həyatımın mənası sayılır”. Bunu Rumıniyanın kişilərdən ibarət basketbol millisinin üzvü Angel Santana deyib.

Bakı-2015 I Avropa Oyunlarında sabah basketbolun 3X3 növündə mübarizə start götürəcək. Santana bu baş tutan mətbuat konfransında Avropa Oyunları barədə təəssüratlarını bölüşüb: “Təəssüratlarımız çox yüksəkdi. Bakı gözəl şəhərdi. Avropa Oyunları da yüksək səviyyədə təşkil edilib”.

O, basketbolun 3X3 növünün yeni olduğunu bildirib: “Bildiyiniz kimi, bu, yeni idman növüdü. Son iki ildə müxtəlif tədbirlərdə iştirak edirik. Rumıniyada iki yarış təşkil edilir. Son ildə Avropa çempionatında qalib olmuşuq. Dünya turu olur. Ölkə daxilində 5-6 yarış keçirilir. Sonra seçim aparılır və beynəlxalq yarışlara aparılır. Bunun klassik basketboldan fərqi daha sürətli olmasıdı. Burda daha çox oynamaq imkanın olur. Çox möhkəm, sürətli olmalısan və tez reaksiya verməlisən”.

Santana Azərbaycan yığmasının gücündən danışıb: “Azərbaycanla seçmə mərhələ oyunlarında görüşmüşdük. Həmin vaxt onlar bizə qalib gəldi. Sonra Avropa çempionatında biz qələbə qazandıq. Güclü idmançılarınız var. Məncə, yüksək yerlərdən birini tutacaqlar”.

Rumıniyalı idmançı əsas rəqibləri barədə də danışıb: “Biz artıq komandaları tanıyırıq. Serbiya, Sloveniya, Litva, İspaniya, Rusiya güclü komandalardı. İtaliya yeni idmançılarla gəlib, onları tanımırıq. Azərbaycanın da geniş imkanları var. Çünki güclü komandaya malikdi. Təbii ki, biz də güclüyük”.

İlhamə Əbülfət


Müəllif: