Saymon Kleq: "Bağlanış mərasimi çox baxımlı olacaq”

“Dünən 7 idman növü üzrə yarış başa çatıb. 19 mindən çox tamaşaçı gimnastikanın müxtəlif növlərində iştirak edib”. Bunu Bakı-2015 I Avropa Oyunları Əməliyyatlar Komitəsinin baş direktoru Saymon Kleq deyib.

Bu gün “Hilton” oteldə ənənəvi mətbuat konfransı keçirən baş direktor dünənin yekunları və bu günün planları ilə bağlı məlumat verib: “7 müxtəlif məkanda təxminən orta tamaşaçı iştirakı 81 faiz olub. Əlavə 12 min bilet satmışdıq. 1600-ə yaxın idmançı və rəsmi nümayəndə artıq Azərbaycanı tərk edib. Bu gün 3 idman növü üzrə finallar keçiriləcək. Tədricən “Tofiq Bəhramov” stadionunu ənənəvi formasına qayıtmasını təmin edirik”.

Baş direktor qeyd edib ki, indiyə qədər yarışlardan bir idmançı kənarlaşdırılıb: “O da dopinqə görə olub. Bu isə Oyunlardan əvvəl olub. Başqa heç bir idmançı qovulmayıb”.

Saymon Kleq Oyunların bağlanış mərasiminin fərqli olacağını deyib: “Müəyyən karnavala bənzər ab-hava gözləmək olar. Stadionda olan insanlarla bərabər Bulvardakı insanlar da məmnun qalacaqlar. Atəşfəşanlıq olacaq. Açılış mərasiminə bənzər, lakin çox baxımlı olacaq”.

Onun sözlərinə görə, Avropa Oyunlarının gələcəyi yayımdan asılı deyil: “Bu yarışlar idmançıların çıxışından asılıdı. Minlərlə idmançının bu yarışlara marağı olsa, əminəm ki, 2019-cu ildə ən yaxşılardan olacaq. Bu da yayımçıların diqqətini cəlb edəcək. Hazırda yayımdan məmnunam. Azərbaycanın gənc, dinamik və bacarıqlı ölkə kimi özünü göstərməsinin bunda böyük rolu var. Heç kim bilmirdi ki, bu Oyunlar necə olacaq. Çünki ilkdi. Ona görə də, hazırkı vəziyyət ürəkaçandı”.

İlhamə Əbülfət