Beş şəhər uğrunda şiddətli döyüş – Rus ordusunun mövqeləri məhv edildi

Rusiya qüvvələri son sutka ərzində də əsas səylərini Kupyan, Liman, Baxmut, Avdiv və Marin şəhərlərinin işğalına yönəldib. Cəbhənin bu istiqamətlərində 26 hərbi toqquşma baş verib.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Baxmut və Marin hərbi əməliyyatların episentrində qalırlar.

Ruslar Kupyan istiqamətində Masyutiv ərazisində uğursuz hücum əməliyyatları keçirib. Kisliv və Kotlyarivə hava zərbələri endirilib.

Liman istiqamətində Biloqorivdə hücum əməliyyatı keçirilsə də, nəticə verməyib.

Rusiya qoşunları Baxmut istiqamətində Xromovoya hücuma keçsə də, istəklərinə nail olmayıb. Avdivdə Pervomayska hücum da uğursuz alınıb.

Marin şəhəri ərazisində rusların çoxsaylı hücumlarının qarşısı alınıb. Şaxtyor istiqamətində isə Preçistivə zərbələr endirilib.

Bundan başqa, Ukrayna Hərbi Hava Qüvvələri gün ərzində Rusiyanın şəxsi heyəti və hərbi texnikasının cəmləşdiyi ərazilərə 15 zərbə endirib. Ötən gün Ukrayna hərbçiləri rus ordusuna məxsus “Ka-52” hücum və kəşfiyyat helikopterini, 4 “Şahid” tipli hücum PUA-snı (İran istehsalı) və 1 “Zala” tipli kəşfiyyat dronunu məhv edib.

Raket qoşunları və artilleriya bölmələri isə 3 idarəetmə məntəqəsini, 4 silah və hərbi texnikanın cəmləşdiyi ərazini, 1 sursat anbarını, atəş mövqelərindəki 2 artilleriya bölməsini və daha 3 mühüm hədəfi vurub.