ABŞ münaqişəni gərginləşdirmək üçün hər şeyi edir - İttiham

"ABŞ və müttəfiqləri Ukraynada münaqişənin gərginləşməsi üçün hər şeyi edirlər"

Teleqraf.com xarici KİV-ə istinadən xəbər verir ki, bunu Rusiya Federasiyası Təhlükəsizlik Şurasının katibi Nikolay Patruşev Cənubi Afrikada həmkarları ilə görüşündə bildirib.

Onun sözlərinə görə, münaqişənin artmasına səbəb Ukraynaya silahların, o cümlədən tükənmiş uranlı mərmilərin, uzaq mənzilli hava-yer tipli qanadlı raketlərin, eləcə də dünyanın bir çox ölkələrində qadağan olunmuş kasetli sursatların tədarükünün artmasıdır.

Qeyd edək ki, iyulun 7-də Ağ Ev kasetli sursatların Ukraynaya təhvil verildiyini elan edib. Eyni zamanda, Amerika prezidentinin milli təhlükəsizlik müşaviri Ceyk Sallivan qeyd edib ki, Vaşinqton Ukraynada kaset mərmilərinin istifadəsinin mülki əhali üçün risklər daşıdığını etiraf edib.

Həmin gün ABŞ prezidenti Co Bayden bildirib ki, kasetli sursatların Ukrayna Silahlı Qüvvələrinə təhvil verilməsi barədə qərar hər iki ölkədə adi mərmilərin tükənməsi ilə əlaqədar verilib.