Rus ordusunun mövqelərinə uğurlu həmlə - İki istiqamətdə irəliləyirlər

Ukrayna qoşunları Baxmut yaxınlığında və Zaporoje vilayətinin qərbində irəliləyib.

Teleqraf.com xəbər verir ki, bu barədə ABŞ-ın Müharibə Araşdırmaları İnstitutu (ISW) məlumat yayıb.

Ukrayna ordusunun Kurdyumivkanın şimal-şərqinə (Baxmutdan 10 km cənub-qərbə) və Zaporoje vilayətin Robotin qəsəbəsindən qərbə doğru irəlilədiyi bildirilib.

Eyni zamanda, Ukrayna ordusunun Baş Qərargahı müdafiə qüvvələrinin Baxmutun cənubunda və Melitopol istiqamətində hücum əməliyyatlarını davam etdirdiyini təsdiqləyib.

Ukrayna Quru Qoşunlarının komandanı, general-polkovnik Aleksandr Sırski deyib ki, Rusiya qoşunları Baxmut yaxınlığındakı mövqelərini ciddi şəkildə gücləndirib, müdafiədən aktiv əməliyyatlara keçiblər.

Rusiya mənbələri iddia edirlər ki, Baxmutun şimal-qərbində Berxivka, Vasyukovka və Orixovo-Vasilivka yaxınlığında mövqe döyüşləri davam edir.