“Ukrayna Hitleri, Napoleonu udan hərb maşını ilə döyüşür” - Tramp

“Kiyev müharibəni dayandırmalıdır. Çünki Ukrayna Rusiyanın timsalında real hərbi maşınla üz-üzə qalıb. Ruslar Napoleonu, Hitleri məğlub ediblər”.

Azpost.info bildirir ki, bu sözləri ABŞ prezidentliyinə namizəd Donald Tramp Fox News telekanalına müsahibəsində Ukrayna prezidenti Zelenski ilə son telefon danışığı barədə suala cavab verərkən deyib. Tramp bildirib ki, bu sözləri o telefon danışığı zamanı Zelenskiyə deyib.

“Prezident Zelenski mənə zəng etdi. Aramızda yaxşı söhbət oldu. Mən dedim ki, biz bu müharibəni bitirməliyik. Bu (Rusiya ordusu – təqribən.) hərbi maşındır. Siz hərbi maşınla qarşı-qarşıya dayanmısınız. Hitleri məğlub ediblər, Napoleonu məğlub ediblər. Sizin yaz hücumu isə baş tutmadı”, – deyə Tramp qeyd edib.

O, Zelenskiyə xəbərdarlıq edib ki, Rusiyanın milyonlarla mina və minlərlə ordu tankı var: “ABŞ və Ukrayna bu münaqişəyə son qoymalıdır. Bu tam bir qaydasızlıqdır. Bu, baş verməməli idi”- eks-prezident vurğulayıb.

Siyasətçi Ukraynadakı münaqişənin günahkarlarından biri kimi ABŞ-ın hazırkı prezidenti Co Baydenin adını çəkib.

Trampın sözlərinə görə, bu münaqişənin başlanğıcını dayandırmaq asan olub. Çünki o, ABŞ prezidenti olanda neftin qiymətini aşağı saxlayıb. Rusiya prezidenti Vladimir Putin isə bunu heç vaxt etməzdi . Siyasətçi deyib ki, Baydenin rəhbərliyi altında yeni hökumətin gəlişi ilə neft qiymətləri artıb və birdən-birə Rusiya külli miqdarda pul əldə edib.

Ağ Evin keçmiş rəhbəri hesab edir ki, Ukrayna münaqişəsinin başlamasının digər səbəbi Əfqanıstandan ABŞ ordusunun çıxması olub: “Putin Əfqanıstandan necə çıxdığımızı gördü. Putin, Çin prezidenti -bu güclü insanlar bunu gördülər”, – deyə Tramp yekunlaşdırıb.