Şirvanın deputatı "Araz”dakı partlayışdan danışdı

Milli Məclisdə Şirvan şəhərini təmsil edən deputat Rəfael Cəbrayılov Müdafiə Sənayesi Nazirliyinin (MSN) bu şəhərdə yerləşən "Araz” zavodunda baş vermiş partlayışla bağlı açıqlama verib.

Millət vəkili Adalet.az-a bildirib ki, hadisə baş verəndən 3 saat sonra Şirvanda olub: "Hazırda rayondayam. Xəsarət alanlara baş çəkmişəm. Həlak olanların dəfn mərasimində iştirak etmişəm. Bildiyiniz kimi hadisə "Araz" zavodunun izolyasiya sexində baş verib. Həmin sex zavoddan 1-2 km-lik məsafədə yerləşir. Sexdə mərmilərin ləvğ olunması prosesi həyata keçirilir. Təəssüflər olsun ki, bəzi insanlar şou yaratmaq və "reytinq" qazanmaq xatirinə qeyri-obyektiv yazılar dərc edirlər".

Rəfael Cəbrayılov qeyd edib ki, hadisə zamanı yaralananların durumuna Müdafiə sənayesi naziri Yavər Camalovla birlikdə şəxsən nəzarət edir: "Onlara hər cür tibbi yardım göstərilib”.