Qardaş türk xalqı Cümhuriyyətə dəstək oldu – XİN-dən açıqlama

Xarici İşlər Nazirliyinin mətbuat xidmətinin rəhbəri Hikmət Hacıyev Bakının erməni daşnak-bolşevik qüvvələrindən azad edilməsinin 100 illiyi ilə əlaqədar açıqlama yayıb.

Teleqraf.com-un məlumatına görə, açıqlamada deyilir:

“15 sentyabr 2018-ci il tarixində Bakının Qafqaz İslam Ordusu tərəfindən erməni daşnak və bolşevik qüvvələrindən azad olunmasının 100 illiyi qeyd edilir.

Bu əlamətdar tarixi hadisənin yüzilliyi münasibətilə Azərbaycan Respublikası Prezidenti İlham Əliyev və qardaş Türkiyə Respublikasının Prezidenti Rəcəb Tayyib Ərdoğanın birgə iştirakı ilə Bakıda təntənəli tədbirlər, iki qardaş ölkənin silahlı qüvvələrinin birgə keçidləri təşkil olunacaq.

I Dünya müharibəsinin çətinliklərinə baxmayaraq, bu gərgin və keşməkşli bir zamanda qardaş türk xalqı paytaxt Bakı və digər şəhər və rayonların işğalçılardan azad edilməsində yeni yaradılmış Azərbaycan Xalq Cümhuriyyətinə dəstək oldu.

Erməni daşnak və bolşevik qüvvələrinin işğalı altında Bakı şəhərində və ətraf ərazilərdə mülki Azərbaycan əhalisinə qarşı amansız qətliamlar, o cümlədən 1918-ci ilin martında məlum mart qırğınları törədilmişdi.

Bakının azad edilməsi ilə yeni yaradılmış Azərbaycan Xalq Cümhuriyyətinin paytaxtının Gəncədən Bakıya köçürülməsi, AXC-nin ərazi bütövlüyünün bərpa edilməsi və Bakı və ətraf rayonlarda yaşayan mülki əhalinin təhlükəsizliyi təmin edildi”.

Açıqlamada təəssüflə bildirilib ki, Ermənistan 1918-1920-ci illərin hadisələrindən nəticə çıxarmayaraq, keçən əsrin sonlarından başlayaraq revizionist, destruktiv və işğalçı siyasətini yenidən başlamış və bu gün də bu siyasət davam etməkdədir:

“1918-1920-ci illərdə olduğu kimi Ermənistan yürütdüyü bu destruktiv siyasətinə, qonşu dövlətlərə qarşı ərazi iddiaları və başladığı müharibəyə görə özünü təcrid vəziyyətindədir. Ulu öndər Heydər Əliyevin “Bir millət, iki dövlət” kəlamını rəhbər tutaraq, Azərbaycan və Türkiyənın tərəfdaşlığı qardaşlıq prinsipləri əsasında günbəgün daha da güclənir, nümunəvi xarakter daşıyır, regionda və onun hüdudlarından kənarda dayanıqlı inkişafa, çiçəklənməyə, sülhə və sabitliyə xidmət edir.

Bu tarixi əlamətdar gündə Qafqaz İslam Ordusunun sıralarında şücaətlə və çiyin-çiyinə döyüşərək paytaxt Bakını və ölkəmizin digər rayonlarını işğalçılardan azad etmiş Azərbaycan və qardaş türk əsgər və zabitlərinin, şəhidlərin əziz xatirəsini hörmət və ehtiramla yad edir və Allahdan onlara rəhmət diləyirik!”