Paşinyandan dəhliz açıqlaması: "İşi tamamladıq, açmağa hazırıq"

Ermənistan Azərbaycan və Türkiyə ilə nəqliyyat yollarını açmağa hazırdır.

Teleqraf.com xəbər verir ki, bunu Ermənistan Baş naziri Nikol Paşinyan deyib.

Baş nazir bildirib ki, nəqliyyat kommunikasiyalarının regional sabitlik, təhlükəsizlik və sülh üçün rolu önəmlidir:

“Sülh, ilk növbədə, xalqlar arasında iqtisadi, mədəni və siyasi əlaqələrin mümkünlüyü və mövcudluğu deməkdir. Bu əlaqələr nəqliyyat kommunikasiyaları olmadan baş tuta bilməz, buna görə də “Sülh qovşağı” layihəsində regional kommunikasiyaların açılması kimi çox mühüm mövzuya yanaşmalarımızı tamamlamışıq”.

Paşinyan xatırladıb ki, Ermənistanın Türkiyə və Azərbaycanla sərhədləri 30 ildir bağlıdır:

“Bu gün regional kommunikasiyaların açılması ilə bağlı çox şeyi müzakirə edirik və mən Ermənistanın regionumuzda kommunikasiyaların açılması ilə bağlı çox təsirli və real addımlar atmağa hazır olduğunu bir daha qeyd etməyi vacib hesab edirəm.

Ermənistan Azərbaycanla dəmir yolu əlaqəsi qurmağa və bərpa etməyə hazır olduğunu bildirir. Üstəlik, mövcud iki dəmir yolu vasitəsilə. Birincisi, Azərbaycanın Qazax rayonunu Ermənistanın Tavuş bölgəsi ilə birləşdirən şimal marşrutu, ikincisi, Azərbaycanın qərb rayonlarını da Naxçıvanla birləşdirən cənub marşrutudur. Hesab edirik ki, Azərbaycanın qərb bölgələri həm də şimal marşrutu ilə Naxçıvan və xarici dünya (Türkiyə - red.) ilə əlaqələndirilə bilər. Bunu rəsmi şəkildə bildirmişik”.

Paşinyan onu da vurğulayıb ki, Ermənistan Türkiyə ilə dəmir və avtomobil yollarını da açmağa hazırdır.

“Sülh qovşağı”nın təməlindəki prinsiplər də qoyulub. Birincisi odur ki, bütün kommunikasiya (və ya nəqliyyat dəhlizləri – red.) kanalları keçdikləri ölkələrin yurisdiksiyası və suverenliyi altında fəaliyyət göstərməlidir. Sonra hər bir dövlət aidiyyəti qurumları vasitəsilə öz ərazisində sərhəd, gömrük nəzarətini və bu kommunikasiyalar üzrə bütün infrastrukturların təhlükəsizliyini təmin edir. Bu problemi həll etmək üçün bu yaxınlarda Ermənistan hökumətinin qərarı ilə Milli Təhlükəsizlik Xidmətində xüsusi bölmə yaradılıb ki, onun məqsədi regional rabitənin təhlükəsizliyini təmin etməkdir.

Növbəti prinsip ondan ibarətdir ki, bütün kommunikasiyalar həm ölkədaxili, həm də beynəlxalq yükdaşıma və rabitə üçün istifadə oluna bilər. Ölkələr bərabərlik və qarşılıqlılıq prinsipinə əsaslanan infrastrukturlardan istifadə edə və qarşılıqlılıq və bərabərlik prinsipi əsasında prosedurlarda bəzi sadələşdirmələr aparıla bilər”, - Paşinyan qeyd edib.

Onun sözlərinə görə, bütün bunlar Ermənistanla Azərbaycan arasında sülhün bərqərar olduğu zaman mümkündür:

“Əsas məsələ sülhün nə dərəcədə mümkün olması və onun hansı prinsiplər çərçivəsində baş tutmasıdır”.