DİN-dən ölümlə nəticələnən yol qəzaları barədə - Açıqlama

Daxili İşlər Nazirliyi istirahət günləri baş verən yol-nəqliyyat hadisələri barədə məlumat yayıb.

Teleqraf.com xəbər verir ki, Tərtər rayonunun Azadqaraqoyunlu kəndi ərazisində kənd sakini Təhməz Məmmədovun idarə etdiyi “VAZ-21074” markalı avtomobillə Bərdə rayon sakini C.Əlizadənin idarə etdiyi “İsuzu” markalı yük avtomobili toqquşub.

Nəticədə T.Məmmədov hadisə yerində ölüb, C.Əlizadə və bir sərnişini xəstəxanaya yerləşdiriliblər.

Daha bir yol qəzası Xaçmaz rayonunun Mürşüdoba kəndi ərazisində baş verib.

Bakı şəhər sakini B.Məmmədovun idarə etdiyi “Renault” və kənd sakini Zakir Pirverdiyevin idarə etdiyi “Azsamand” markalı avtomobillər toqquşub.

Nəticədə Z.Pirverdiyev aldığı xəsarətlərdən hadisə yerində ölüb, 2 sərnişini xəstəxanaya yerləşdirilib.

Oxşar hadisə Tovuz rayonunun Cəlilli kəndi ərazisində qeydə alınıb.

Ağstafa rayon sakini R.Nağıyev idarə etdiyi “Mercedes” markalı avtomobillə yolu keçən kənd sakini 9 yaşlı Həsən Quliyevi vurub.

Nəticədə xəstəxanaya yerləşdirilmiş azyaşlı orada ölüb.

Qazax rayonunun Hüseynbəyli kəndi ərazisində Kosalar kənd sakini C.Əhmədov idarə etdiyi “VAZ-21013” markalı avtomobillə yolu keçən kənd sakini Vüqar Qəhrəmanovu vurub.

Nəticədə xəstəxanaya yerləşdirilmiş piyada orada ölüb.

Bundan başqa, Cəlilabad rayonunun Əliqasımlı kəndi ərazisində Üçtəpə kənd sakini R.Qasımov idarə etdiyi “VAZ-2106” markalı avtomobillə yolu keçən həmkəndlisi Elşad İmanovu vurub.

Nəticədə piyada xəstəxanaya aparılarkən yolda ölüb.