DİN-dən ötən gün baş verən hadisələr barədə - Açıqlama

Daxili İşlər Nazirliyi ötən gün ərzində baş verən cinayət faktları və hadisələr barədə məlumat yayıb.

Teleqraf.com xəbər verir ki, respublikanın avtomobil yollarında ölümlə nəticələnən 3 yol-nəqliyyat hadisəsi baş verib, nəticədə 3 nəfər ölüb.

Oktyabrın 25-də saat 2 radələrində Sabunçu rayonunun Kürdəxanı qəsəbəsi ərazisində yolu keçən Sabirabad rayon sakini Elçin Babayev müəyyən edilməyən avtomobillə vurulub və o, hadisə yerində ölüb.

Baş verən hadisə ilə bağlı Sabunçu rayon Polis İdarəsi tərəfindən əməliyyat-axtarış tədbirləri aparılır.

Bundan başqa, oktyabrın 25-də saat 6 radələrində Sumqayıt şəhəri ərazisində yolu keçən şəhər sakini İman Mahmudov müəyyən edilməyən avtomobillə vurulub və o, hadisə yerində ölüb. Polis əməkdaşlarının keçirdikləri əməliyyat-axtarış tədbirləri nəticəsində yol-nəqliyyat hadisəsinin “VAZ-21010” markalı avtomobillə törədilməsi müəyyən olunub və həmin avtomobilin sürücüsü, Sumqayıt sakini, əvvəllər məhkum olunmuş Camal Əliyev saxlanılıb.

Bu hadisə ilə bağlı Sumqayıt şəhər Polis İdarəsində araşdırma aparılır.

Oxşar hadisə Bərdə rayonunda da qeydə alınıb. Oktyabrın 25-də saat 20 radələrində Bərdə rayonunun Qarayusifli kəndi ərazisində rayon sakinləri E.İmanovun idarə etdiyi “Mercedes” markalı avtomobillə S.Məhərrəmovun idarə etdiyi “MTZ-80” markalı traktor toqquşub.

Nəticədə “Mercedes” markalı avtomobildə olan sərnişin Rəqsanə Kərimova hadisə yerində ölüb.

Fakt üzrə Baş İstintaq və Təhqiqat İdarəsi tərəfindən araşdırma aparılır.