Səfirlik Leyla və Arif Yunuslarla bağlı bəyanat yaydı

“Məhkəmə orqanlarına siyasi bəyanatlarla təzyiq göstərilməsi qəbuledilməzdir”

Azərbaycanın Almaniyadakı səfirliyi Leyla Yunus və Arif Yunus haqda çıxarılmış məhkəmə hökmünün Almaniyadakı bəzi dairələr tərəfindən siyasiləşdirməsi cəhdlərini pisləyən bəyanat yayib. Səfirlikdən qəzetimizə daxil olan bəyanatda vurğulanır ki, hüquqi dövlətdə törədilmiş cinayətin müvafiq cəzası olmalıdır. Hər bir demokratik ölkədə olduğu kimi, insan hüquqları müdafiəçisi olmaq və ya hər hansı bir digər status Azərbaycan Respublikasının qanunları qarşısında məsuliyyətdən azad etmir.

Bəyanatda bildirilir ki, Leyla Yunus və Arif Yunusun azadlıqdan məhrum etmə cəzasına məhkum edilməsi prosesi Azərbaycan Respublikasının birinci instansiya məhkəməsi tərəfindən açıq və Azərbaycan Respublikasının qanunvericiliyinə uyğun şəkildə baş verib, məhkəmə prosesi xarici diplomatlar və beynəlxalq təşkilatların nümayəndələri tərəfindən sərbəst şəkildə müşahidə olunub. Buna baxmayaraq, Almaniyadakı bəzi dairələr müstəqil məhkəmənin qərarına hörmətsizlik edərək, onu əsassız olaraq siyasiləşdirməyə cəhd göstəriblər.

Bəyanatda həmçinin qeyd olunur ki, ölkəmizdə müstəqillik əldə olunmasından sonra demokratik-hüquqi dövlət quruculuğu uğurla həyata keçirilib. Ölkənin müstəqil məhkəmə orqanlarının işinə siyasi bəyanatlarla təzyiq göstərilməsi qəbuledilməzdir.

Səxavət