Məşhur türk prodüser Azərbaycanda film çəkir - "İstəyirik ki..."

Türkiyənin "Eslem Film Yapım" şirkətinin rejissor-prodüseri Yalçın Çoban Teleqraf.com-a müsahibə verib.

Onunla müsahibəni təqdim edirik:

- Yalçın bəy, bir müddət əvvəl türkiyəli rejissor Selahattin Sancaklı və "Kurtlar Vadisi Pusu" serialının Yasini Ertuğrul Şakar ölkəmizin qonağı oldular. Qarabağla bağlı layihədə yer alacaqlarını bildirdilər. Bu layihə haqqında nə deyə bilərsiniz?

- "Eslem Film Yapım" şirkəti olaraq Azərbaycana 15 layihə təqdim etmişik. Buraya serial, film və sair daxildir. Azərbaycanda aktyorluq sənəti ilə bağlı məktəb açmaq istəyirik. Məktəbə müraciət edən tələbələrimiz iki həftə ödənişsiz dərslərimizdə iştirak edə biləcəklər. Onlar dərslərə davam etdikləri halda ödəniş təqdim edəcəklər. Dərslərimizdə iştirak edən insanlar Türkiyə və Azərbaycanda həyata keçirəcəyimiz layihələrdə rol alacaqlar. Əsas məqsədimiz ortaya keyfiyyətli işlər çıxarmaqdır.

- Qarabağ və Şuşa ilə bağlı layihənizin hazırlıqlarına başlanılıbmı?

- Qeyd etdiyiniz kimi Qarabağ və Şuşa ilə bağlı layihəmiz var. Hazırda hazırlıqlar başlanılıb. Şuşaya məkanlara baxmağa gedəcəyik.

- Layihədə türklərlə yanaşı azərbaycanlılar da iştirak edəcəklərmi?

- Bəli, türklərlə yanaşı azərbaycanlılar da rol alacaqlar. Amma daha çox türklər çəkiləcəklər. Serial olacaq və ekran əsərini "Kurtlar Vadisi Pusu"nun rejissoru Selahattin Sancaklı çəkəcək. Serialda aktyor Ertuğrul Şakar da yer alacaq. İşlərimizin başında onlar var və Allahın icazəsi ilə keyfiyyətli iş ortaya qoymağa çalışırıq.

- Serialın adını açıqlaya bilərsiniz?

- Serialın adını yaxın günlərdə açıqlayacağıq.

- Şirkətiniz tərəfindən çəkilən "Karım" adlı qısametrajlı filminiz mükafata layiq görüldü. Azərbaycanda da belə bir layihə etməyi düşünürsünüzmü?

- Bəli, qadına şiddətə qarşı film çəkdik və qadınların səsi olmağa çalışdıq. Filmimiz mükafata layiq görüldü. Bu, bizim üçün böyük qürur oldu. Azərbaycanda da qadına şiddətə qarşı film çəkmək istəyirik.