Nadir Qafarzadə yeni işlərindən danışdı

Müğənni Nadir Qafarzadə yaradıcılıq işlərindən danışıb.

Teleqraf.com-a açıqlama verən ifaçı bildirib ki, sözləri Leyli Erola, musiqisi Hakan Erola məxsus "Sən xoşbəxt ol" adlı mahnı ifa edib: "Yaradıcılıq işlərimlə bağlı yeniliklərim boldur. Müğənninin işi mahnı oxumaq və klip çəkdirməkdir. Mən də illərdir ki, bu işlə məşğulam. Tamaşaçı və ya dinləyicilər bu işlərimizi qiymətləndirmək əvəzinə, bəzən sosial şəbəkədə tənqidi mesajlar da yazırlar. Həmin tənqidi mesajları yazanlar öz cavablarını alırlar. Heç bir neqativ fikir mənim kefimi korlaya bilməz. Həmin insanlara fikir versəydim, mən bu gün Nadir Qafarzadə olmazdım. Siz danışmağınızda, tənqid etməyinizdə olun. Amma çaşmayın. Mənə qarşı çaşanların aqibəti pis olur".

N.Qafarzadə onu da əlavə edib ki, müğənni Ayan Babakişiyeva ilə növbəti dəfə duet oxuyacaq: "Ayanla birgə ifa etdiyimiz "Sənin üçün" mahnısı çox sevildi və deyərdim ki, "Youtube"da xeyli izləndi. Həmin mahnını 2013-ci ildə oxumağımıza baxmayaraq, hələ də sevilir. Elə bu mahnının sevildikdən sonra növbəti dəfə duet oxumaq qərarına gəldik. Yeni ifa edəcəyimiz bəstə "Xəyanətkar" adlanır. Həmin mahnını bir müddət sonra dinləyicilərin ixtiyarına verəcəyik".

Rəqsanə