Bankın vəzifəli şəxslərinin məhkəməsi başladı

Bu gün Bakı Ağır Cinayətlər Məhkəməsində “ZaminBank” ASC-nin Cənub filialının vəzifəli şəxslərinin cinayət işi üzrə məhkəmə başlayıb.

Teleqraf.com xəbər verir ki, ZaminBank” ASC-nin Cənub filialının müdiri vəzifəsində işləyən Müşfiq Bayramovun və filial əməkdaşlarının sənədləri saxtalaşdırmaqla ayrı-ayrı şəxslərin adından banka depozit kimi qoyulmuş 49 min manat və 2 min ABŞ dolları məbləğində pulu mənimsəyiblər.

Müşfiq Bayramov Cinayət Məcəlləsinin 179.2.3 (mənimsəmə və ya israf etmə), 179.2.4 və 179.3.2-ci maddələrində, filialın baş mühasibi Nailə İsgəndərova və xəzinə müdiri Mehriban İsmayılova isə həmin məcəllənin 308.1-ci (vəzifə səlahiyyətlərindən sui-istifadə) maddəsi ilə ittiham olunurlar.

İstintaq dövründə dəymiş ziyanın 41 300 manatının ödətdirilməsi təmin edilib.

Hakim Əlövsət Abbasovun sədrliyi ilə keçirilən prosesdə təqsirləndirilən şəxslərin cinayət işi üzrə məhkəmənin hazırlıq iclası olub. Məhkəmə baxışı sentyabrın 18-nə təyin olunub.

Hacı Zeynalov