Bakının 4 rayonunda əməliyyat: Həbs olunanlar var

Bakının Qaradağ rayonunda əməliyyat keçirilib.

Teleqraf.com xəbər verir ki, Baş Narkotiklərlə Mübarizə İdarəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində Qaradağ rayonu ərazisində yaşayan Ə.Hüseynov saxlanılıb.

Şəxsi axtarış zamanı ondan 7 qrama yaxın heroin aşkar edilib.

Davam etdirilən tədbirlərlə onun yaşadığı evə baxış zamanı isə əlavə olaraq 1 kiloqramdan artıq heroin, 603 qramdan çox metamfetamin, 236 qramdan artıq marixuana və 4 ədəd elektron tərəzi aşkar edilib.

Bundan başqa Nəimanov rayonunda oğurluq faktının açılması üçün əməliyyat keçirilib.

Nərimanov rayon Polis İdarəsinin 18-ci polis şöbəsinin əməkdaşları tərəfindən avqustun 26-da rayon ərazisindəki mağazaların birindən 450 manat dəyərində şokolad və mobil telefon oğurlamaqda şübhəli bilinən paytaxt sakini, əvvəllər məhkum olunmuş E.Xudiyev saxlanılıb.

Oxşar əməliyyat Nəsimi rayonunda da keçirilib.

Nəsimi rayon Polis İdarəsinin 22-ci polis şöbəsi əməkdaşlarının keçirdikləri əməliyyat-axtarış tədbirləri nəticəsində avqustun 21-dən 24-dək olan müddətdə Ə.Firuziyə məxsus “Haouje” markalı motosikleti qaçırmaqda şübhəli bilinən Abşeron rayon sakini, əvvəllər məhkum olunmuş T.Maksimov avqustun 26-da Ş.Bədəlbəyli küçəsində motosikleti idarə edərkən saxlanılıb.

Suraxanı rayon Polis İdarəsinin 30-cu polis şöbəsinin əməkdaşları tərəfindən rayon ərazisindəki evlərin birindən 700 manat dəyərində televizor oğurlamaqda şübhəli bilinən Bakı şəhər sakini R.Cahangirov tutulub.