Rüşvət alan hakimin işində Misir Mərdanovun qardaşının adı hallandı

Bu gün Gəncə Ağır Cinayətlər Məhkəməsində dələduzluq və rüşvət verməkdə təqsirləndirilən keçmiş hakim Həsən Əliyev, Elman Məmmədov və Taleh Süleymanovun barəsində olan cinayət işi üzrə məhkəmə prosesi davam etdirilib.

Teleqraf.com xəbər verir ki, hakim Mübariz Məmmədovun sədrliyi ilə keçirilən prosesdə zərərçəkən Əmiraslan Mustafayev ifadə verib. Zərərçəkmiş ifadəsində sabiq təhsil naziri Misir Mərdanovun adını hallandırıb. O, qeyd edib ki, təqsirləndirilən Elman Məmmədova 6 min manat verib.

Onun sözlərinə görə, Elman Məmmədov onun oğlu Qurban Mustafayevi ali məktəblərdən birinə köçürəcətyinə vəd verib. O, qeyd edib ki, Elman Məmmədv bu köçürülmə prosesini Misir Mərdanovun qardaşı İlham Mərdanovun vasitəsi ilə həhyata keçirməyə vəd verib.
Proses davam edir.

Xatırladaq ki, Rusiyadan gələn iş adamı Ramazan Səlimov Azərbaycanda “yağlı” işə düzəlmək üçün 2011-ci ildən tanıdığı Elman Məmmədova müraciət edib. Elman Məmmədov isə onu Bakı Ağır Cinayətlər Məhkəməsinin hakimi Həsən Əliyevlə tanış edib. Həsən Əliyev də Ramazan Səlimovdan sonuncunu işə düzəltmək adı ilə 600 min manat pul alıb. Lakin sonradan pulu qaytarmayıb.

Bundan sonra Ramazan Səlimov polisə şikayət edib. Şikayət əsasında cinayət işi başlanılıb və Elman Məmmədov həbs edilib. İstintaq dövründə Həsən Əliyevə qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmə) maddəsi ilə bərabər Cinayət Məcəlləsinin 312-ci (rüşvət vermə) maddəsi ilə də ittiham elan olunub. Lakin barəsində həbs-qətimkan tədbiri seçilməyib.

Onu da qeyd edək ki, prezident İlham Əliyev bu il fevralın 11-də Həsən Əliyevin səlahiyyətlərinə vaxtından əvvəl xitam verilməsi haqqında sərəncam imzalayıb. Buna səbəb kimi Həsən Əliyevin qanunvericiliyin tələblərini dəfələrlə kobudcasına pozması göstərilib.

Hacı Zeynalov