Aptek işçisinə qarşı quldurluq edən həbs edildi

Bakının Sabunçu rayonunda quldurluq edən şəxs həbs edilib. Teleqraf.com xəbər verir ki, iyunun 2-də Məhəmmədi qəsəbəsində aptek işçisi Davud Vəliyevə qarşı quldurluq edən Rüfət Məmmədov saxlanılıb.

Qeyd edək ki, iyunun 2-də, gecə saatlarında aptekə əvvəllər də oradan bir neçə dəfə dərman almış bir müştəri gəlib. O, satıcıya dərmanların siyahısını təqdim edib. Əczaçının başı siyahıdakı dərmanları axtarmağa qarışanda “müştəri” sellofan torbada özü ilə gətirdiyi baltanı çıxarıb və satıcı Davud Vəliyevin başına zərbə endirib.

Satıcı yerə yıxılsa da, özünü itirməyib və müqavimət göstərib. Müştəri həmin şəxsə balta ilə zərbə endirib. Həmin şəxs kassadan 300 manata yaxın pulu götürərək hadisə yerindən uzaqlaşıb. Davud Vəliyevin harayına qonşuluqda yaşayanlar gəlib və onu xəstəxanaya çatdırıblar. Xeyli qan itirən zərərçəkmiş satıcı həkimlərin səyi nəticəsində sağ qalıb.

Faktla bağlı Cinayət Məcəlləsinin 181-ci (quldurluq) maddəsi ilə cinayət işi başlanıb.

Hacı Zeynalov