“Ümidlərin İzi ilə” kitabı Qazaxıstanda - FOTO

Qazaxıstan Respublikasında Azərbaycanla bağlı tədbir keçirilib. Qazaxıstanın Əl-Farabi Dövlət Universitetində, Türkçə Danışan Jurnalistlər birliyi, “Global Karyer İnstitutu” və həmin universitetin Jurnalistika fakultəsinin dəstəyi ilə Şəmil Sadiq və Müşfiq Xan tərəfindən qələmə alınan Qarabağ müharibəsi zamanı erməni vəhşiliyindən bəhs olunan “Ümidlərin İzi ilə” kitabının təqdimatı keçirilib.

Teleqraf.com xəbər verir ki, Əl-Farabi Universitetinin Jurnalistika fakültəsinin dekanı Prof.Dr. Meduebek Sagatbek tədbiri açaraq, Qazaxıstanda daim diqqətdə saxlanılan Dağlıq Qarabağ problemindən bəhs edib. O bildirib ki, kitabı oxuyaraq Qarabağ müharibəsi, bu müharibənin meydana çıxardığı problemlərlə yaxından tanış olmaq olar.

Tədbirin ideya müəllifi və təşkilatçılarından olan “Global Karyer İnstitut”nun Direktoru və Azərbaycan Şimali Kipr Dostluq Cəmiyyətin Sədri Orxan Həsənoğlu vurğulayıb ki, Azərbaycan Prezidenti İlham Əliyevin son illər apardığı xarici siyasət əsasən Dağlıq Qarabağ probleminin həllinə köklənib. Biz də türk dövlətlərində bu təbliğatın aparılmasını özümüzün vətəndaşlıq borcu hesab edirik. Bu gün türk xalqlarının ən böyük problemlərindən biri bir-birlərini tam anlaya bilməməsidir. Bunu nəzərə alaraq romanın Qazaxıstanda nəşrini rus dilinə tərcümə etdirərək yayımladıq. Çalışacağıq ki, bu sahədəki fəaliyyətimiz davamlı olsun və Qarabağ mövzusundakı əsərlərin qazax türkcəsində nəşrinə nail olaq.

Azərbaycanda fəaliyyət göstərən aktiv QHT-lərdən biri olan Gənclər üçün Təhsil Mərkəzinin (GTM) icraçı direktoru Fəxrəddin Həsənzadə də çıxış edərək türkdilli xalqların ortaq problemlərindən danışıb. QHT rəhbəri bildirib ki, bu cür ortaq problemlərdən biri də Ermənistan tərəfindən Azərbaycan torpaqlarının – Qarabağın və ona bitişik rayonların işğalıdır. Bu işğal nəticəsində ölkəmizdə 1 milyondan artıq qaçqın və məcburi köçkün yaranıb. Daşnaklar tərəfindən Qarabağ müharibəsi zamanı amansızcasına qətllər törədilib. Müharibə qanunları pozularaq yaşlı, uşaq və qadınlar, əliyalın insanlar öldürülüb. 1991-ci ilin 26 fevralında dünyadakı ən böyüj qətliamlarından biri – “Xocalı faciəsi” törədilib.

Bizim burda olmaqda əsas məqsədimiz bu kitab vasitəsilə Qarabağda baş verənləri dünyaya çatdırmaqdır
Qazaxıstanın Türkçə Danışan Jurnalistlər birliyinin sədri Naziya Zoyamərgənqızı Azərbaycanın problemlərinə işıq tutmağa hər zaman hazır olduqlarını bildirərək, iki dost və qardaş ölkənin ortaq problemi olan Dağlıq Qarabağ və Xocalı soyqırımının Qazaxıstan xalqını narahat etdiyini diqqətə çatdırıb.

UNESCO təmsilçisi, TÜRKSOY təmsilçisi və çox sayda qonağın qatıldığı tədbirdə yekun nitqini kitabın həmmüəllifi Şəmil Sadiq edərək, iştirakçı və jurnalistlərin suallarını cavablandırıb.

Sonda tədbir iştirakçılarına kitablar imzalanaraq hədiyyə olunub.