11 İyun 17:08
652

Azərbaycanın Birinci vitse-prezidenti, Heydər Əliyev Fondunun prezidenti xanım Mehriban Əliyevanın və fondun vitse-prezidenti Leyla Əliyevanın təşəbbüsü ilə Uşaqların Beynəlxalq Müdafiəsi Gününə həsr olunan silsilə tədbirlərin təşkili davam etdirilir.

Teleqraf.com xəbər verir ki, tədbirlər çərçivəsində “Birlik” Xeyriyyə Təşkilatı tərəfindən valideyn himayəsindən məhrum və xüsusi qayğıya ehtiyacı olan, o cümlədən Qaradağ rayonundakı 6 saylı somatik sanatoriyada reabilitasiya və sanator-müalicə prosesi keçən, eləcə də daun sindromlu və müxtəlif uşaq evlərinin sakinləri olan uşaqlar üçün musiqili-əyləncəli xeyriyyə tədbiri keçirilib.

Tədbirə dövlətin uşaq məsələləri ilə bağlı siyasətinin həyata keçirilməsində fəal iştirak edən digər QHT-lərin, eləcə də ictimaiyyətin nümayəndələri, çoxlu sayda azyaşlılar qatılıblar.

“Birlik” Xeyriyyə Təşkilatının üzvləri çıxış edərək uşaqlara dövlətimizin göstərdiyi hərtərəfli diqqət və qayğıdan danışıblar. Valideynlər uşaqlara yaradılan şəraitə və qayğıya görə Azərbaycan Prezident İlham Əliyevə, Birinci vitse-prezident xanım Mehriban Əliyevaya və valideyn himayəsindən məhrum və xüsusi qayğıya ehtiyacı olan uşaqları daim yada salan, onların problemləri ilə maraqlanan Heydər Əliyev Fondunun vitse-prezidenti Leyla Əliyevaya minnətdarlıqlarını bildiriblər.

Tədbirin bədii hissəsi konsert proqramı ilə davam edib. Bədii hissədə tanınmış incəsənət ustalarının, o cümlədən populyar müğənnilər - Əməkdar Artist Ədalət Şükürov, Azad Şabanov, Sevda Yəhyayeva, Xəyyam Nisanov, Elçin Cəfərov, Samirə Əfəndiyeva, Murad Arif, Nərmin Kərimbəyova və Rauf Əhmədovun ifaları iştirakçılar tərəfindən coşqu ilə qarşılanıb.

Şən klounların, illüzionistlərin, animatorların çıxışları və müxtəlif fləşmoblar tədbirə xoş ovqat bəxş edib.


Müəllif: Teleqraf.com
Загрузка...