Mütəllimova: "Beyin əməliyyat; keçirmişəm, heç yerə çıxmıram"- Müsahibə

Xalq artisti Firəngiz Mütəllimova Teleqraf.com-un suallarını cavablandırıb.

Onunla müsahibəni təqdim edirik.

- Prezident İlham Əliyev Azərbaycanda 2022-ci ilin “Şuşa İli” elan edilməsi haqqında sərəncam imzaladı. Şuşalı kimi təəssüratlarınızı eşitmək istərdik.

- Cənab prezidentə təşəkkür edirəm. Çox sevindim ki, 2022-ci ili "Şuşa İli" elan etdi. Fikirləşirəm ki, işğaldan azad olunmuş Şuşanın indi buna ehtiyacı var. Şuşa yalnız Qarabağın yox, bütün Azərbaycanın döyünən ürəyidir.

- 2022-ci ildə Şuşaya yenidən səfəriniz gözlənilirmi?

- İnşallah. Yəqin ki, "Şuşa İli" olduğuna görə tədbirlərin sayı çox olacaq. Bir şuşalı kimi böyük məmuniyyətlə doğma şəhərimə yenidən getmək istəyirəm. Ürəyimdən keçir...

- Şuşada olanda evinizə də getdiniz. Evinizlə bağlı hansı istəkləriniz var?

- İstərdim evimiz tam təmir edilsin. Çünki ondan yalnız daşlar qalıb. Arzulayıram ki, yenə evimizdə ocaq qalansın, işıqlarımız yansın, valideynlərimin ruhu şad olsun.

- Şuşadan gətirdiyiniz torpağı saxlayırsınızmı?

- Atamla-anamın qəbrinin üzərinə apardım.

- Doğulduğunuz şəhərdə sənət baxımından nələr etmək istərdiniz?

- Hazırda pandemiyaya görə evdən çox çıxmamağa çalışıram. Bilirsiniz ki, səhhətimə görə özümü qoruyuram. Beyin əməliyyatı olmuşdum. Pandemiya olduğundan heç nə edə bilmirəm. Nə televiziya kanallarına çıxıram, nə də seriallara çəkilirəm...

- Bəs, teatrda hansı tamaşalarda oynayırsınız?

- Teatrın açılışında "Qarabağnamə" əsərində oynadım. Teatrda da elədir ki, tamaşan, məşqin yoxdursa, əlavə işçilərin teatra gəlişinə icazə verilmir. Pandemiyaya görə qayda-qanunlara riayət edilir.

- Sizi hansı tamaşalarda görəcəyik?

- Hələ onu bilmirik. Pandemiya bitənə qədər orta yaş və gənclərə üstünlük verilir. Çünki yaşlı nəsil arasında xəstəliyi olan insanlar var.

- Teatrlar pandemiyaya görə uzun müddət bağlı qaldı. Teatr səhnəsi üçün darıxmışdınızmı?

- Bəli, çox darıxmışdım. 30 ilə yaxındır "Qarabağnamə" tamaşasını oynayırdıq. Tamaşa dərdli-qəmli günlərdə - soyqırımı günündə, 20 Yanvar ərəfəsində oynanılırdı. Amma teatrın açılışında "Qarabağnamə" tamaşasında qələbə çalmış müstəqil ölkənin vətəndaşı kimi qürur hissi ilə oynadım.

- Yeni ili necə qeyd etdiniz?

- Yeni ili evdə çox sadə qeyd etdim. Bütün Azərbaycan xalqına, əzizlərimə, can sağlığı arzu edirəm. Ən önəmlisi budur. Can sağlığ varsa, hər şey yaxşıdır, yoxsa yox.